Azərbaycan, Bakı, 22 iyul/ Trend , müxbir R.Novruzov/ ATƏT-in Minsk Qrupunun həmsədri Metyu Brayza hesab edir ki, Dağlıq Qarabağ münaqişəsinin həlli üzrə hər hansı bir proqnoz vermək hələ tezdir.
"Bu iki tərəfin - Azərbaycan və Ermənistanın kompromisə nail olub-ola bilməyəcəkləri məsələsi hələ də aktualdır", - ATƏT-in Minsk Qrupunun amerikalı həmsədri Metyu Brayza "Azadlıq" radiosuna müsahibəsində bildirib.
İki Cənubi Qafqaz ölkəsiarasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Dağlıq Qarabağ və ona bitişik yeddi rayon - Azərbaycan ərazisinin 20 faizi Ermənistan Silahlı Qüvvələrinin işğalı altındadır. 1994-cü ilin mayında tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə hələ ki nəticəsiz sülh danışıqları aparılır.
"Dağlıq Qarabağ münaqişəsi dünyadakı mürəkkəb münaqişələrdən biridir və onun yekununu əvvəlcədən görmək mümkün deyil", - Brayza bildirib. Amerikalı həmsədr münaqişənin həllinin tapılacağına ümid etdiyini bildirib.
Müəlliflə əlaqə saxlamaq üçün elektron ünvan: [email protected]