Azərbaycan, Bakı, 28 sentyabr /Trend/
Azərbaycan XİN-in rəhbəri Elmar Məmmədyarov ATƏT-in Minsk qrupunun həmsədrləri ilə öz qoşunlarını Azərbaycan ərazilərindən çıxarmayan Ermənistanın günahı üzündən yaranan Dağlıq Qarabağ münaqişəsinin nizamlanması üzrə danışıqlar prosesindəki vəziyyəti müzakirə edib.
Görüş Nyu-Yorkda BMT Baş Assambleyasının 67-ci sessiyası çərçivəsində keçirilib. Trend-in məlumatına görə, bu barədə Azərbaycan XİN-in rəsmi saytında bildirilir.
Məmmədyarov Ermənistanın nizamlama prosesindəki status-kvonun saxlanması üçün istənilən metoddan istifadə etdiyini həmsədrlərin diqqətinə çatdırıb.
Minsk qrupunun həmsədrləri vasitəçi ölkələrin prezidentlərinin bəyanatlarını bir daha təsdiqləyərək Qarabağ problemində status-kvonun saxlanmasının yolverilməz olduğunu qeyd ediblər.
Məmmədyarov bir daha vasitəçilərin diqqətinə çatdırıb ki, Ermənistan Silahlı Qüvvələri Azərbaycanın işğal olunmuş ərazilərindən çıxmayınca, regionda sülhə, stabilliyə və təhlükəsizliyə təhdid qalmaqda davam edəcək.