Azərbaycan, Bakı, 1 oktyabr / Trend, müxbir S.Əhmədova /
Azərbaycan tolerant ölkədir və işğal edilmiş torpaqlar geri qaytarılmalıdır.
Trend-in məlumatına görə, bunu Böyük Britaniya Parlamentinin üzvü, Hərrou İst əyalətindən seçilmiş millət vəkili, Yerli Özünüidarə və Biznes Komitəsinin üzvü Bob Bləkman Avropa Azərbaycan Cəmiyyətinin (AAC) sorğusuna cavabında bildirib.
B.Bləkman deyib: "Öz milli və dini tolerantlığı ilə ad çıxarmayan Cənubi Qafqaz ölkələri arasında Azərbaycan tamam fərqli mövqeyə malikdir. Çünki bu ölkə bütün dini etiqadları və etnik azlıqları təşviq edir. Suriya, Yaxın Şərq və Şimali Afrikada radikal islamın baş qaldırdığı, Misirdə isə xristianların təzyiq altında olduğu bir zamanda yaşayırıq".
B.Bləkmanın sözlərinə əsasən, xristian ölkəsi olan Ermənistanın Azərbaycan torpaqlarının 20 faizini işğal etməsinə baxmayaraq, Azərbaycandakı xristian və yəhudi icmalarının inkişafı üçün hər çür şərait yaradılıb.
B.Bləkman qeyd edib: "Bu, ölkənin dünyəvilik prinsiplərinə sadiqliyi yolundan dönməzliyinin bariz göstəricisidir. Həmin faktı qəbul etmək və alqışlamaq lazımdır. Bundan əlavə, beynəlxalq ictimaiyyət beynəlxalq hüquqa əməl olunması və Azərbaycan torpaqlarının geri qaytarılması üçün daha çox iş görməlidir. Azərbaycan açıq şəkildə nümayiş etdirmişdir ki, bütün dinlərə qarşı sadəcə tolerantlıq göstərilmir, eyni zamanda, bu dinlər təşviq olunur. Odur ki, işğal altında olan torpaqlar arxayınlıqla Azərbaycanın nəzarətinə qaytarıla bilər."