Azərbaycan, Bakı / Trend müxbir S.İlhamqızı/ Azərbaycanın tarixində olan faciələr, soyqırımlar Milli Məclisdə yaradılmış tədqiqat-informasiya mərkəzində araşdırılacaq, müvafiq sənədlər, nəşrlər hazırlanacaq. Bu barədə millət vəkili Həvva Məmmədova məlumat verib.
Millət vəkili qeyd edib ki, tədqiqat-informasiya mərkəzinin Əsasnamə və Nizamnaməsi hazırlanıb Milli Məclis tərəfindən təsdiq ediləcək. Onun sözlərinə görə, azərbaycanlıların ermənilər tərəfindən soyqırımlara məruz qalması, öz yurdlarından qaçqın-köçkün düşməsi və digər tarixi faktlara dair məlumatlar bu mərkəzdə toplanacaq. Hər bir deputatın qarşısına ölkədən kənara çıxanda bu məlumatlarla, lazımi nəşrlərlə getmək, səfər etdikləri ölkələrdə onları yaymaq vəzifəsi qoyulacaq.
Deputat Məmmədova onu da deyib ki, fevralın 16-da Milli Məclisdə yaradılmış Xocalı Komissiyası da öz fəaliyyətini dayandırmayacaq. Komissiya Xocalı soyqırımının dünyada tanıdılması üçün xarici ölkə parlamentlərinə müraciətlər edəcək.
