Azərbaycan, Bərdə / Trend müxbir Ş.Cəliloğlu/ ATƏT-in fəaliyyətdə olan sədrinin şəxsi nümayəndəsinin mandatına uyğun olaraq bu gün Goranboy rayonunun Tapqaraqoyunlu kəndi yaxınlığında, qoşunların təmas xəttində keçirilən monitorinq zamanı insident baş verməyib.
Monitorinq keçirilməzdən öncə ATƏT-in nümayəndələri Goranboy rayon icra başçısı Novruz Novruzovla görüşüb. Görüşdə Novruzov bildirib ki, ermənilərin atəşkəsi intensiv pozması nəticəsində qoşunların təmas xəttində olan kəndlərin evlərinə, orta məktəbə ziyan dəyib.
Monitorinqi ATƏT-in fəaliyyətdə olan sədrinin şəxsi nümayəndəsi Ancey Kaspşik, onun səhra köməkçiləri Piter Ki və Jaslan Nurtazin keçirəcəklər.
Azərbaycanın beynəlxalq səviyyədə tanınan ərazisi sayılan təmas xəttinin qarşı tərəfində isə monitorinqi ATƏT-in fəaliyyətdə olan sədrinin şəxsi nümayəndəsinin səhra köməkçiləri İmre Palatinus və Miroslav Vimetal keçirəcəklər.
Azərbaycanın Goranboy rayonu paytaxt Bakıdan 320 kilometr qərbdə yerləşir.