Azərbaycan, Bakı / Trend , müxbir S.İlhamqızı/ Müsavat Partiyası builki prezident seçkisində "Azadlıq" bloku ilə əməkdaşlıq etməyi düşünür.
"Prezident seçkisini boykot etməsinə baxmayaraq, biz "Azadlıq" bloku ilə əməkdaşlıq edə bilərik"- deyə Müsavat Partiyasının mərkəzi icra aparatının rəhbəri Arif Hacılı çərşənbə axşamı Trend ə açıqlamasında bildirib.
Müxalifət düşərgəsində iri partiyalardan sayılan Müsavat Partiyası oktyabrda keçiriləcək prezident seçkisində öz namizədi ilə iştirak etmək barədə ötən il qərar çıxarıb. Müxalifətçi Azərbaycan Xalq Cəbhəsi, Vətəndaş və İnkişaf, Liberal partiyalarını birləşdirən "Azadlıq" bloku isə, seçkidə iştirak etmək fikrində deyil.
Hacılı bildirib ki, Müsavat Partiyası "Azadlıq" bloku ilə əməkdaşlıq üçün ortaq məqamlar tapa bilər: "Çünki "Azadlıq" bloku da ölkədə demokratik şəraitin yaradılmasında maraqlıdır"-deyə Hacılı bildirib.
"Azadlıq" blokunda təmsil olunan Azərbaycan Liberal Partiyasının sədr əvəzi Əvəz Temirxan Trend ə açıqlamasında bildirib ki, blokun Müsavat Partiyası ilə əməkdaşlığı bir şərtlə mümkündür: "Seçkiyə hazırlaşmasına baxmayaraq, Müsavat Partiyası bəyan etməlidir ki, seçki komissiyalarının tərkibi paritet əsasda formalaşmayacağı, iqtidarın nəzarətindən çıxmayacağı təqdirdə, prezident seskisində iştirak etməyəcək" - deyə Temirxan bildirib. Əlavə edib ki, əgər əməkdaşlıq baş tutarsa, "Azadlıq" bloku və Müsavat Partiyasının seçkidə vahid namizədlə iştirakının tərəfdarıdır.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub, qazandığı səslərə görə, 8 namizəd arasında ikinci olub. Partiya hazırda beş nəfər deputatla parlamentdə təmsil olunur.
Liberal Partiyanın lideri, keçmiş dövlət katibi Lalə Şövkət də 2003-cü il prezident seçkisində namizəd olub və qazandığı səslərə görə İsa Qəmbərdən sonra - üçüncü olub.
2005-ci ilin parlament seçkisi ərəfəsində Müsavat Partiyası "Azadlıq" blokunda təmsil olunub. Blokdakı digər partiyalar seçkinin nəticələrini tanımayıb, Müsavat isə, parlamentdə iştirak etdiyi üçün, "Azadlıq" blokunu tərk edib.