Azərbaycan, Bakı, 10 yanvar/ Trend , müxbir İ.Əlizadə/ Azərbaycan Parlamenti ölkədə istehsal olunan kənd təsərrüfatı məhsullarının keyfiyyətinin artırılmasını nəzərdə tutan qanun layihəsi hazırlayır. "İnsanların zəhərlənməsi, müxtəlif xəstəliklərə yoluxması ekoloji cəhətdən təmiz olmayan məhsullardan istifadənin nəticəsidir. Ən təhlükəlisi isə ondan ibarətdir ki, insanlar ekoloji cəhətdən keyfiyyətsiz və orqanizmə mənfi təsir edən məhsullardan istifadə etdiklərindən xəbərsiz olurlar" - deyə cümə axşamı Azərbaycan Parlamentinin Aqrar siyasət məsələləri daimi komissiyasının sədri Eldar İbrahimov bildirib.
Komissiya sədri qeyd edib ki, yeni qanun layihəsinin hazırlanmasında məqsəd Azərbaycanda ekoloji cəhətdən təmiz və keyfiyyətli məhsulların istehsal olunmasını təmin etməkdir. "Məhsullar istehsal olunur, lakin onların tərkibinin nədən ibarət olduğu, insan orqanizminə necə təsir etdiyi məlum deyil. Qanun layihəsində keyfiyyətli kənd təsərrüfatı məhsulunun istehsalı mexanizminin yaradılması, keyfiyyətsiz məhsul istehsalının qarşısının alınması və bu işlə məşğul olan şəxslərin cəzalandırılması kimi məsələlər əks olunub".
Qanun layihəsi yanvarın 20-dən sonra Milli Məclisin Aqrar siyasət məsələləri daimi komissiyasında müzakirə olunacaq. Layihə Parlamentin yaz sessiyasında müzakirəyə çıxarılacaq.
Parlamentin yaz sessiyası fevralın 1-də başlayır.