Azərbaycan, Bakı, 24yanvar / Trend , müxbir S.İlhamqızı/ Dünya Azərbaycanlıları Konqresinin (DAK) rəhbərliyinə qarşı çıxan qrupun - keçmiş sədr Cavad Derəxtinin tərəfdarlarının planlaşdırdığı növbədənkənar qurultayın vaxtı müəyyənləşdi.
Həmin qrupun nümayəndəsi, DAK-ın ABŞ üzrə təmsilçisi Rəhim Şahbazi cümə axşamı Trend ə məlumat verib ki, növbədənkənar qurultayın fevralın 23-24-də Stokholm şəhərində keçirilməsi qərara alınıb.
DAK-ın ötən ilin yayında keçirilmiş 9-cu qurultayında Qulamrza Səbri Təbrizi yeni sədr seçilib. Qurultaydan sonra Təbrizinin fəaliyyətinə etiraz edən bir qrup DAK fəalı təşkilatın növbədənkənar qurultayını çağırmağa qərar verib. Onlar iddia edirlər ki, DAK-ın ötən 9-cu qurultayından bəri, Təbrizinin başçılığı ilə təşkilatda özbaşınalıq, Nizamnamə pozuntusu baş verib, qurultay iştirakçıları tərəfindən seçilmiş DAK-ın İdarə Heyəti üzvlərinin vəzifələri dondurulub.
Şahbazi bildirib ki, DAK-in 10 illik tarixində ilk dəfə olaraq təşkilat belə bir böhran vəziyyətə düşüb. Şahbazinin dediyinə görə, növbədənkənar qurultayı DAK-Avropa, ABS Numayəndəliyi və daha 10 ölkədəki nümayəndəlik keçirəcək.
DAK-ın sədri Təbrizi isə qarşı tərəfin ittihamlarını təkzib edir. O, Trend ə açıqlamasında bildirib ki, Derəxti ötən qurultayda yenidən sədr seçilə bilmədiyi üçün DAK daxilində qarışıqlıq yaratmaq istəyir. Təbrizinin sözlərinə görə, Derəxtinin tərəfdarlarının keçirəcəyi qurultay legitim sayıla bilməz və bu, yalnız DAK-ı parçalamağa xidmət edir.
