Azərbaycan, Bakı, 28 yanvar / Trend , müxbir S.İlhamqızı/ Müxalifətçi Ümid Partiyası fevralın 1-dən prezident seçkisinə hazırlığa start verəcək. Bu barədə bazar ertəsi Trend ə Ümid Partiyasından məlumat verilib. Bu ilin oktyabrında Azərbaycanda növbəti prezident seçkisi keçiriləcək. Ümid Partiyasının sədri İqbal Ağazadə seçkidə namizədliyini irəli sürəcəyini açıqlayıb.
Ümid Partiyası Məclisinin bazar günü keçirilən iclasında partiyanın prezident seçkisinə hazırlıqla bağlı proqram layihəsi təsdiqlənib. Fevralın 1-dən layihənin icrasına başlanmasına qərar verilib.
Partiyadan bildirilib ki, prezident seçkisinə rəsmən start verilmədiyi üçün Ümid Partiyasının seçki kampaniyası, seçkiyə hazırlıq proqramı barədə ətraflı məlumat açıqlanmır.
Partiyanın Məclisi həmçinin yeni yaradılmış rayon şöbələrinin səlahiyyətlərini təsdiq edib, Naxçıvan Muxtar Respublikası ərazisindəki yerli təşkilatların Əsasnaməsini təsdiqləyib və həmin təşkilatlar Naxçıvan şəhər şöbəsinin tabeçiliyinə verilib.
Məclis Ümid Partiyasının üzvlük vəsiqəsini də təsdiq edib. Artıq partiya üzvlərinə vəsiqələrin verilməsinə başlanılacaq və partiya üzvlərinin sayı müəyyənləşdiriləcək.
Müxalifətçi Ümid Partiyasmının sədri Ağazadə Milli Məclisin deputatıdır.
