Azərbaydcan, Bakı, 29 yanvar /müxbir Trend , C.Babayeva/ Gürcüstandakı Rusiya hərbi bazalarından Ermənistandakı hərbi bazaya köçürülən silahlar içərisində qadağan olunması nəzərdə tutulan kasetli silah növləri də var. Bu barədə çərşənbə axşamı Minalar Əleyhinə Azərbaycan Kampaniyası İctimai Birliyinin 2007-ci ilin yekunlarına həsr olunmuş hesabatında məlumat verilib.
Kasetli silah növlərinin qadağan olunmasını nəzərdə tutan yeni beynəlxalq müqavilənin hazırlanmasına dünyanın 46 ölkəsi dəstək verir. Bu ölkələrin rəsmi nümayəndələri keçən ilin fevralında Osloda "Oslo Bəyannaməsi" qəbul ediblər. Oslo konfransında Azərbaycan rəsmi olaraq iştirak etməmişdir.
Hesabata əsasən, bu silah növləri "Qrad" tipli reaktiv atəş sistemi üçün 1240 ədəd 122 mm-lik, "Uraqan" üçün 572 ədəd 220 mm-lik, 3500 ədəd 152 mm-lik mərmilərdir. Bundan başqa, Ermənistanda hərbi bazaya köçürülən silahlar arasında piyadalar və tanklar əleyhinə minalar da var.
İctimai Birliyin sədri Hafiz Səfixanovun bildirdiyinə görə, bütün bu məlumatlar Piyadalar Əleyhinə Minaların Qadağan Olunması Uğrunda Beynəlxalq Kampaniya və bu problemlərlə məşğul olan digər beynəlxalq təşkilarlara çatdırılıb və araşdırmalar aparılır.
