Azərbaycan, Bakı, 4 fevral / Trend , müxbir İ.Əlizadə/ Azərbaycan Parlamentində "İcbari sığorta" haqqında qanun layihəsi hazırlanır. "Qanun layihəsi dövlət işində çalışanların, hərbi qulluqçuların məcburi sığorta olunmasını nəzərdə tutur" - deyə bazar ertəsi Trend ə açıqlamasında Milli Məclisin İnzibati və hərbi qanunvericilik şöbəsinin müdir müavini Səyyad Kərimov bildirib.
Azərbaycan Parlamenti "İcbari tibbi sığorta haqqında" qanun qəbul edib. Yanvarın 1-dən qanunun həyata keçirilməsinə başlanılıb.
Kərimov qeyd edib ki, "İcbari sığorta" haqqında qanun layihəsinin hazırlanması "İcbari tibbi sığorta haqqında" qanunun tətbiq olunması ilə bağlıdır. Bundan başqa, Parlament tərəfindən qəbul olunan bir neçə qanun layihəsində dövlət işində işləyənlərin və hərbi qulluqçuların icbari sığorta olunması nəzərdə tutulub. Yeni qanun layihəsində bu məsələlər ümumiləşdiriləcək.
Onun sözlərinə görə, dövlət işində işləyənlərin və hərbi qulluqçuların icbari sığorta olunması onların sosial vəziyyətini yaxşılaşdıracaq.
Qanun layihəsi gələn il qəbul oluna bilər.