Azərbaycan, Bakı, 12 fevral / ", müxbir S.İlhamqızı/ "Azadlıq" bloku prezident seçkisində iştirak etməyəcəksə, bu, aktiv boykot xarakteri alacaq və blok cəmiyyətə qərarını əsaslandıracaq. Bu fikirləri Trend ə açıqlamasında "Azadlıq" blokunun həmsədri Əli Əliyev bildirib.
Bu ilin oktyabrında Azərbaycanda növbəti prezident seçkisi keçiriləcək. Müxalifət düşərgəsindən Müsavat, ADP, Ümid, Böyük Quruluş partiyaları seçkidə öz namizədi ilə iştirak edəcəyini açıqlayıb. AXCP, ALP və VİP-in təmsil olunduğu "Azadlıq" bloku isə, seçkidə iştirak etmək üçün seçkiqabağı demokratik mühitin, bütün namizədlər üçün bərabər şərait yaradılmasını, söz azadlığının, sərbəst toplaşmaq hüququnun təmin olunmasını tələb edir. Bu şərait yaradılmayacağı təqdirdə, seçkini boykot edəcəyini açıqlayıb.
Əliyev bildirib ki, blok seçkidə iştirak etməyəcəksə, ölkə əhalisini seçkini aktiv şəkildə boykot etməyə çağıracaq: "Biz qeyri-azad seçkidə iştirak edərək cəmiyyəti aldatmaq, ümid verərək, sonra insanları böyük ümidsizliyə, depressiyaya salmaq istəmirik. Həmçinin, seçki tamaşasında dekorasiya rolunu oynamayacağıq. Biz başa düşürük ki, boykot ideal variant deyil, amma cəmiyyəti aldatmaqla dürüst olmaq arasında seçim edib, boykota üstünlük veririk"-deyə Əliyev bildirib.
O, əlavə edib ki, "Azadlıq" bloku həm beynəlxalq, həm də Azərbaycanın ictimaiyyətinə boykot qərarını əsaslandırılmış şəkildə çatdıracaq. Eyni zamanda, minimal demokratik şərait yaradılsa, blok seçkidə iştirak edəcək.
Müəlliflə əlaqə saxlamaq üçün elektron ünvan - [email protected]