Azərbaycan, Bakı, 15 fevral / Trend , müxbir C.Babayeva/ 18 müxalifət partiyasının təsis etdiyi "Demokratik Seçki Mərkəzi" tam tərkibdə fəaliyyət göstərməyəcək.
Keçən ilin dekabrında Azərbaycanın 18 müxalifət partiyası əməkdaşlıq barədə saziş imzalayıb. Sazişi "Bizim Azərbaycan" blokuna daxil olan səkkiz partiya, Klassik Xalq Cəbhəsi Partiyası (KXCP), Sosial-Demokrat, Vətəndaş Həmrəyliyi, Böyük Quruluş, Azadlıq, Milli-Demokrat, Ədalət, Ümid partiyaları və "Azərbaycan Yolu" Siyasi Hərəkatı imzalayıb. Yanvarın 30-da partiyalar "Demokratik Seçki Mərkəzi"nin yaradılmaıs barədə qərar qəbul edib.
Azadlıq Partiyasının sədri Əhməd Orucun cümə günü Trend ə bildirdiyinə görə, cümə günü "Demokratik Seçki Mərkəzi"nin (DSM) iclasında əsasnamə birinci oxunuşda qəbul olunub və razılaşdırılması üçün partiyalara təqdim olunub.
Orucun sözlərinə görə, DSM-in bugünkü iclasına "Bizim Azərbaycan" bloku və "Azərbaycan Yolu" Siyasi Hərəkatının (AYSH) nümayəndələri qatılmayıblar.
"Bu siyasi təşkilatların Mərkəzdə təmsil olunmaları barədə məsələ açıq qalmaqdadır", deyə o bildirib.
"Azərbaycan Yolu" Siyasi Hərəkatı sədrinin təşkilati məsələlər üzrə müavini Şəmsəddin Rəhimlinin cümə günü Trend ə bildirdiyinə görə, yeni Mərkəzin əsasnaməsinin hərəkata təqdim olunmasından asılı olmayaraq AYSH həmin mərkəzdə təmsil olunmayacaq.
"Bizim Azərbaycan" blokunun sədri Vüqar Bəyturanın cümə günü Trend ə bildirdiyinə görə, Mərkəzdə təmsil olunmaqla bağlı yekun qərarın bazar günü keçiriləcək iclasda qəbul olunacağı gözlənilsə də, Blokun həmin qurumda təmsil olunmayacağını indidən söyləmək olar.
Bəyturanın sözlərinə görə, keçən ilin dekabrında 18 partiyanın imzaladığı əməkdaşlıq sazişində Mərkəzin yaradılması ilə bağlı heç bir müddəa olmayıb.