Azərbaycan, Bakı, 18 fevral / Trend İ.Əlizadə/ Azərbaycan Parlamentinin komissiya sədri hesab edir ki, rəsmi Bakı Kosovonun müstəqilliyini tanıya bilməz. Bizim mövqeyimiz ondan ibarətdir ki, Azərbaycan heç vaxt etnik münaqişələrin bu formada həll olunması və dünən baş verən hadisə ilə razılaşa bilməz" - deyə bazar ertəsi Trend ə açıqlamasında Milli Məclisin İnsan hüquqları daimi komissiyasının sədri, Azərbaycanın ATƏT Parlament Assambleyasındakı nümayəndə heyətinin üzvü Rəbiyyət Aslanova bildirib.
1999-cu ildən formal olaraq Serbiya ərazisinin bir hissəsi olan Kosovo BMT-nin tabeliyindədir. Bazar günü Kosovo Serbiyadan ayrılaraq müstəqilliyini elan edib. Avropa Birliyi və bir sıra Qərb ölkələri Kosovonun müstəqilliyini tanımağa hazır olduğunu bildirib. Rəsmi Belqrad vilayətin müstəqilliyi ilə barışmaq niyyətində deyil. Rusiya Belqradın mövqeyini dəstəkləyir.
Aslanova qeyd edib ki, Azərbaycan bütün məsələlərin, o cümlədən etnik münaqişələrin beynəlxalq hüquq normaları və prinsipləri əsasında həll olunmasını dəstəkləyir.
"Amma Azərbaycan Kosovonun birtərəfli şəkildə öz müstəqilliyini elan etməsini qəbul edə bilməz. Məlumatlara görə, Avropanın bir neçə ölkəsi Kosovonun müstəqilliyini tanımağa hazırlaşır. Bu, çox qorxulu vəziyyətdir. Dünən baş verən hadisə separatçılığa aparan bir yoldur və münaqişələrin həll olunması üçün çox pis nümunədir" - deyə komissiya sədri bildirib.
Aslanova qeyd edib ki, əgər ATƏT PA-da Kosovonun müstəqilliyinin tanınması məsələsi müzakirəyə çıxarılsa, Azərbaycan nümayəndə heyəti buna səsə verməyəcək. ATƏT Parlament Assambleyasının qış sessiyası fevralın 21-22-də Vyanada keçiriləcək. Sessiyada Kosovo məsələsi və "Avropada adi silahlı qüvvələrə dair" müqavilənin şərtlərinə əməl olunması məsələsi müzakirə ediləcək.
