Azərbaycan, Lənkəran. 18 fevral / Trend , müxbir P.Əliyeva/ 1 saylı Ərazi üzrə Ekologiya və Təbii Sərvətlər Şöbəsinin Qızılağac qoruğunun əməkdaşları ilə birgə keçirdiyi növbəti reyd nəticəsində qoruqda qanunsuz ov ilə məşğul olan vətəndaşlardan 6 ədəd ov tüfəngi götürüb. Götürülən silahların kimə məxsus olmaları araşdırılması üçün hüquq mühafizə orqanlarına təhvil verilib.
Aparılan araşdırmalardan sonra silahlardan birinin Salyan rayon sakini Fuad Həsənova, digərinin isə Biləsuvar rayon sakini Fizuli İbayevə məxsus olduğu müəyyən edilib. Digər dörd silahın sahibləri ərazidən qaçdıqları üçün kimlikləri müəyyənləşdirilməyib.
Qızılağac Dövlət qoruğunun rəisi Fizuli Məmmədovun sözlərinə görə ay ərzində qoruq ərazisində aparılan reydlər zamanı 11 cinayət faktı aşkar edilib ki, bunlardan 8-i qanunsuz ov etmə, digər üçü isə qanunsuz balıq ovudur. Ümumilikdə qanunsuz ov nəticəsində təbiətə dəyən ziyanın müqabilində cinayətkarlara qarşı 7 min manata yaxın iddia qaldırılıb. Neftçala və Masallı rayon hüquq mühafizə orqanlarına cinayətkarların yaxalanması üçün müraciət olunub.
