Azərbaycan, Bakı, 20 fevral / Trend , müxbir Q.Cəbiyev/ Hakim Yeni Azərbaycan Partiyası (YAP) müxalifəti partiyanın namizədi, indiki prezident İlham Əliyevi dəstəkləməyə çağırıb. "İlham Əliyev prezident seçkilərində alternativsiz namizəd olmalıdır. Müxalifət reallığı başa düşərək YAP-ın namizədini dəstəkləməlidir" çərşənbə günü YAP-ın Yasamal rayon təşkilatının toplantısında çıxışı zamanı partiyanın İdarə Heyətinin üzvü Abel Məhərrəmov bildirib.
Azərbaycanda prezident seçkisi oktyabrın əvvəlində keçiriləcək. YAP seçkiləridə partiyanın sədri İlham Əliyevin namizədliyini irəli sürəcəyini açıqlayıb. 10 müxalifət partiyası isə artıq seçkilərə öz namizədləri ilə gedəcəklərini bəyan edib. "Azadlıq" blokunda cəmləşən müxalif Xalq Cəbhəsi, Vətəndaş və İnkişaf, Liberal partiyaları seçki komissiyalarının paritet əsasda formalaşmayacağı təqdirdə, seçkini boykot edəcəklərini bildiriblər.
Məhərrəmov deyib ki, YAP seçki təbliğatını yaxşı aparsa, müxalifət reallığı başa düşəcək və hakimiyyətin namizədini dəstəkləyəcək.
YAP 1992-ci ilə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 16 ildir hakim partiya olan YAP-ın indiki sədri prezident İlham Əliyevdir.
