Azərbaycan, Bakı, 21 fevral / Trend , müxbir S.İlhamqızı/ Gürcüstan Azərbaycanlılarının Milli Assambleyası bu ölkədə yaşayan azərbaycanlıların sosial-iqtisadi problemlərinin həlli yollarına dair təkliflər paketi hazırlayıb. Bu barədə Trend ə Assambleyanın rəhbəri Daşqın Gülməmmədov məlumat verib.
Onun sözlərinə görə, təkliflər Gürcüstanın Bolinisi, Marneuli rayonlarında əhaliyə torpaqların paylanması, suvarma sisteminin rekonstruksiyası, bir neçə istiqamətdə avtomobil yollarının təmiri ilə bağlıdır.
Gülməmmədov bildirib ki, əkin sahələrinin satışı ilə Gürcüstanın İqtisadi İnkişaf Nazirliyi məşğul olur və qiymətlərin baha olması azərbaycanlılar üçün problemdir.
Onun sözlərinə görə, 1 hektar sahənin özəlləşdirilmə qiyməti 250 lariyə başa gəlir.
Ona görə də nazirliyə təklif olunur ki, qiymətlərdə güzəştlər tətbiq edilsin, bu qiymət 150 lariyə (90 dollar) endirilsin.
Gülməmmədovun sözlərinə görə, azərbaycanlıların kompakt yaşadığı Bolinisi, Marneuli, Qardabani rayonlarında suvarma sistemi iflic vəziyyətindədir və buna görə kənd təsərrüfatı ilə məşğul olan təxminən 100 min nəfər sakin yaşadığı yerləri tərk edib, əsasən Azərbaycan, Rusiya və Türkiyəyə gediblər.
Paketdə təklif olunur ki, suvarma kanallarının təmir-bərpası üçün hökumət dotasiya ayırsın və əhaliyə öz texnikasını təklif etsin.
"Marneuli rayonu ərazisində Təpəkey çayı üzərindəki köhnə bəndin bərpasını təklif edirik. Bunun üçün GAMA öz fondundan 10 min dollar ayırıb və hökumətin də 40 min dollar ayırmasını təklif edirik. Bu pulla həmin bənd yenilənə bilər. Həmin bənddən 4 arx ayrılır və kəndələrə gedir, lakin yararsız vəziyyətdə olduğu üçün əhali əkin sahələrini suvara bilmir"-deyə Gülməmmədov bildirib.
Paketdə həmçinin təklif olunur ki, kasıb əhali, çoxuşaqlı ailələr üçün xüsusi fond yaradılsın. Gülməmmədovun sözlərinə görə, Gürcüstan azərbaycanlıları arasında 20 minə yaxın tənha, övladı olmayan insan, 30 minə yaxın isə çoxuşaqlı ailə var. Dövlətin nümayəndələrinin də iştirakı ilə ictimai fond yaradılması, əhalinin bu təbəqəsinə hər ay ərzaq verilməsi, maliyyə vəsaiti ayrılması təklif olunur. GAMA rəhbəri bildirib ki, təkliflər paketi yaxın günlərdə Gürcüstanın Nazirlər Kabinetinə təqdim ediləcək.