Azərbaycan, Bakı, 22 fevral / Trend , müxbir Q.Cəbiyev/ Hakim Yeni Azərbaycan Partiyası (YAP) bəyan edib ki, müxalifətin YAP-dan çıxarılan üzvlərinin adının hallandırılmasında məqsəd yalançı imitasiya yaradaraq, iqtidar partiyası haqqında ictimai rəydə müəmmalı fikir formalaşdırmağa cəhd edir. ""YAP-da monolit birlik var. Zaman-zaman müxalifət öz zəifliyini ört-basdır etmək, tərəfdarlarında ümid qığılcımları yaratmaq məqsədi ilə YAP daxilində guya hansısa ziddiyətin olduğunu mətbuata çıxarmağa çalışırlar və partiyadan kənarlaşıdırılan şəxslərin adlarını hallandırırlar" cümə günü Trend ə YAP-ın icra katibinin müavini Mübariz Qurbanlı bildirib.
Bir müddət öncə YAP-dan qovulan partiya üzvləri Ariz Abduləliyev və Əsədulla Qurbanov partiyadan çıxarılmaları ilə razılaşmayaraq məhkəməyə müraciət etmək niyyətindədirlər.
Qurbanlı deyib ki, YAP çıxarılan üzvlərin partiya daxilində heç bir dayağı yoxdur. "Onların məhkəməyə müraciət etmək hüququ var. Həmin şəxslərin geri qayıtması isə mümkün deyil" Qurbanlı əlavə edib. Onun sözlərinə görə, YAP-da hansısa qarşıdurma və ziddiyyət yoxdur.
YAP 1992-ci ildə keçmiş prezident Heydər Əliyev tərəfindən yaradılıb. Partiyanın hazırki sədri, prezident İlham Əliyevdir.