Azərbaycan, Bakı, 26 fevral / Trend , müxbir C.Babayeva/ 2008-ci il Azərbaycanda keçiriləcək prezident seçkisi ilə əlaqədar təsis olunacaq müxalifət partiyalarının gənclər təşkilatlarının "Biz" koalisiyasının əsas məqsədi Azərbaycanın demokratik inkişafında gənclərin rolunu artırmaqdır. Bu barədə Trend a koalisiyanın həmtəsisçilərindən biri olan Müsavat Partiyasının gənclər təşkilatının sədri Tural Abbaslı açıqlama verib.
Abbaslının sözlərinə görə, koalisiyada təmsil olunmaqla bağlı Azərbaycanın Liberal, Demokrat, Xalq Cəbhəsi, Vətəndaş və İnkişaf partiyalarının gənclər təşkilatları və sədrlərinin razılığı əldə olunub.
"Gənclər təşkilatlarının sədrləri koalisiyanın həmtəsisçiləri olacaq və qərarlar adi səs çoxluğu ilə qəbul olunacaq. Koalisiyanın fəaliyyət istiqamətlərinə demokratiyanın imkan verdiyi maksimum azadlıqlardan istifadə olunması, etiraz aksiyalarının keçirilməsi, tələbələrin universitetlərdə iş aparması daxildir", deyə Abbaslı bildirib.
Onun sözlərinə görə, "Biz" koalisiyası prezident seçkiləri ilində fəaliyyət göstərəcək və koalisiyanın ümumrespublika koalisiyasına çevrilməsi planlaşdırılır.
Digər nüfuzlu müxalifət partiyalarının gənclər təşkilatları ilə də danışıqların aparıldığını bildirən Abbaslı koalisiyanın rəsmi təqdimatının cəmiyyətdə tanındıqdan sonra keçiriləcəyini qeyd edib.
Abbaslının sözlərinə görə, koalisiyada həmçinin Azərbaycanın müstəqil gənclər təşkilatları - Azərbaycan Demokratik Gənclər Tələbə Təşkilatı, "Yeni nəsil" təşkilatı da təmsil olunur və digər müstəqil gənclər təşkilatları ilə müzakirələr aparılır.
"Dalğa" Gənclər Hərəkatının sədr əvəzi Araz Qasımovun çərşənbə axşamı Trend a bildirdiyinə görə, rəhbərlik etdiyi hərəkatın koalisiyada təmsil olunması qeyri-realdır.
"Dalğa" Hərəkatı prezident seçkiləri ərəfəsində öz fəaliyyətini yalnız xalqın maarifləndirməsinə yönəldəcək", deyə Qasımov bildirib.
