Azərbaycan, Bakı, 17 mart/ Trend , müxbir E.Hüseynov/ Azərbaycandakı siyasi məhbuslar üzrə AŞPA-nın Monitorinq Komitəsinin xüsusi məruzəçisinin təkrar təyin edilməsi məsələsi gündəmdə deyil. "Hər bir halda, bu məsələ Avropa Şurası Parlament Assambleyasının aprel sessiyası çərçivəsində müzakirə edilməyəcək" - bazar ertəsi Azərbaycanın Avropa Şurasındakı nümayəndəsi, səfir Arif Məmmədov Trend a bildirib.
AŞPA-nın xüsusi nümayəndəsinin təyin edilməsi məsələsi martın 14-də Strasburqda, Parlament Assambleyası Bürosunun iclasında Azərbaycandakı siyasi məhbuslar haqqında məsələnin müzakirəsindən sonra azərbaycanlı hüquq müdafiəçiləri tərəfindən qaldırılıb. Hüquq müdafiəçilərinin qiymətləndirmələrinə görə, məruzəçinin təyin edilməsi haqqında qərar martın 18-də, AŞPA-nın Monitorinq Komitəsinin iclasında və ya təşkilatın apreldə keçiriləcək yaz sessiyasında qəbul edilə bilər.
Məmmədov telefonla Strasburqdan bildirib ki, Azərbaycan hakimiyyəti tərəfindən "bu sahədə konkret addımların" atılması ilə əlaqədar məruzəçinin təyin edilməsi haqqında məsələ Büronun iclasında ümumiyyətlə qaldırılmayıb. "Buna görə bu məsələ hələ ki, gündəmdə deyil. Hər bir halda, sessiyanın iclası zamanı bu məsələ qaldırılmayacaq" - Azərbaycanın Avropa Şurasındakı daimi nümayəndəliyinin rəhbəri Məmmədov bildirib.
Monitorinq Komitəsinin nümayəndələri fevralda Azərabaycana səfər ediblər. "Komitə özü bu məsələ ilə məşğul olduğu üçün xüsusi məruzəçinin təyin edilməsinə ehtiyac yoxdur" - diplomat bildirib və əlavə edib ki, Büroda bu məsələnin hələ ki, dövri olaraq Monitorinq Komitəsi tərəfindən nəzərdən keçirilməsi haqqında qərar qəbul edilib.
Azərbaycan 2001-ci ilin yanvarında Avropa Şurasına qəbul edilərkən ölkədə siyasi məhbuslar haqqında məsələnin tamamilə yox olması haqqında öz üzərinə öhdəlik götürüb. Avropalı hüquq müdafiəçiləri azərbaycanlı həmkarları ilə birlikdə 700-dən çox siyasi məhbusun adının qeyd olunduğu siyahı hazırladıqdan sonra, 2001-ci ildən 2005-ci ilədək AŞPA-nın xüsusi məruzəçisi fəaliyyət göstərib. Hazırkı vaxtadək müxtəlif yerli hüquq müdafiəçilərinin məlumatlarına görə, siyasi məhbusların siyahısında 30-dan 100-dək siyasi məhbusun adı ola bilər.