Azərbaycan, Bakı, 18 mart / Trend , müxbir C.Babayeva/ Çərşənbə axşamı Qarabağ Azadlıq Təşkilatı (QAT) ATƏT-in Minsk Qrupu ölkələrinin BMT Baş Assambleyasında Azərbaycanın işğal olunmuş ərazilərdəki vəziyyətə dair qəbul olunmuş Qətnamənin əleyhinə səs verməsinə etiraz əlaməti olaraq, ABŞ, Rusiya və Fransanın Bakıdakı səfirliklərinə qara lentlə bağlanmış sarı rəngli gül dəstələri və məktublar təqdim edib. Bu barədə Trend -a QAT-ın mətbuat xidmətindən məlumat verilib.
Məlumata əsasən, QAT etirazını bu formada ilaxır çərşənbə günündə bildirməklə, bu ölkələrin səfirlərinin Novruz bayramı münasibətilə müxtəlif tədbirlərdə iştirak edərək, guya Azərbaycan xalqına rəğbət bəslədiklərini göstərmək cəhdlərinə inanmadığını nümayiş etdirib.
Səfirliklərə təqdim olunmuş məktublarda Minsk Qrupu həmsədr ölkələrinin Qətnamə əleyhinə səs verməsi Azərbaycanın ərazi bütövlüyünə hörmətsizlik və Ermənistanın işğalçı niyyətlərinə dəstək kimi qiymətləndirilib.
QAT Minsk Qrupu həmsədrlərinin fəaliyyətinin dayandırılmasını tələb edib və bu istiqamətdə müxtəlif təzyiq vasitələrindən istifadə edəcəyini bildirib.
