Azərbaycan, Bakı, 19 mart / Trend , müxbir S.İlhamqızı/ Böyük Quruluş Partiyası aprelin əvvəlindən başlayaraq Dövlət Əmlakının İdarə Edilməsi üzrə Dövlət Komitəsinin qarşısında etiraz aksiyaları keçirəcək. Bu barədə Trend a partiyanın sədri Fazil Qəzənfəroğlu məlumat verib.
Partiya 2004-cü ildən bəri qərargahla təmin olunması üçün dəfələrlə Dövlət Əmlakının İdarə Edilməsi üzrə Dövlət Komitəsinə müraciət edib. Dövlət Komitəsinin ötən il BQP-yə təklif etdiyi Bakının 8-ci mikrorayonundakı obyektdən isə partiya imtina edib, Qəzənfəroğlu bunu həmin yerin təmirsiz, yararsız vəziyyətdə olması ilə izah edib.
BQP sədri bildirib ki, qərargah problemi partiyanın fəaliyyətinə, qarşıdan gələn prezident seçkisində iştirakına əngəl törədən ən mühüm problemdir.
O əlavə edib ki, partiya qərargahla təmin olunana qədər Dövlət Komitəsinin qarşısında ayda bir dəfə piket keçirəcəklər. Bununla bağlı martın sonunda Bakı Şəhər İcra Hakimiyyətinə müraciət olunacaq.
Müxalifətçi BQP 2004-cü ildə yaradılıb, 2005-ci ildə dövlət qeydiyyatına alınıb. Partiyanın sədri Qəzənfəroğlu Milli Məclisin deputatıdır.
