Azərbaycan, Bakı, 08 may/ Trend , müxbir D.Xatınoğlu/ İran parlamentində hakim partiyanın radikal nümayəndələrinin sabiq prezident Məhəmməd Xatəmiyə sərt reaksiyaları müxalifətə qarşı qanunsuz siyasi təzyiqdir. "Parlamentdə hakim partiyanın radikal nümayəndələrinin sabiq prezidentə qarşı təzyiqləri qanunsuzluqdur" - deyə, "Etimad-Milli" Partiyasının mərkəzi heyətinin üzvü xanım Mehrəngiz Mürüvvəti Trend -a bildirib.
İranın İSNA Agentliyinin mayın 6-da yaydığı məlumata əsasən, Xatəmi "İslam inqilabını dünyaya ixrac etmək xarici ölkələrdə təxribat törətmək demək deyil"- deyib və hakimiyyəti dolayısıyla tənqid edib. Mayın 7-də isə, 77 deputat Xatəmiyə ciddi xəbərdarlıq edilməsini Parlamentə tövsiyə edib. Lakin bu tövsiyə bəzi deputatların ciddi etirazı ilə qarşılaşdığından, parlament onu qəbul etməyib.
"Parlament ölkənin sabiq prezidentinə xəbərdarlıq vermək səlahiyyətində deyil və bu məsələ Milli Məclisin daxili qanunlarına ziddir"- deyə, Parlamentin azəri əsilli deputatı Mürüvvəti cümə axşamı Tehrandan telefonla bildirib. Onun sözlərinə görə, Xatəmiyə hücumlar yeni deyil və indiyədək dəfələrlə hakim partiya olan "Üsulgəra"nın (fundamentalist) bəzi radikal üzvləri dəfələrlə ona və digər islahatçı fəallara qarşı məntiqsiz ittihamlar səsləndiriblər.
İran deputatının fikrincə, Xatəmi beynəlxalq səviyyədə mədəni prezident kimi tanınıb və prezidentliyi dövründə uğurlu daxili və xarici siyasət aparıb. "Parlamentdə hazırda əksəriyyət təşkil edən bəzi radikal nümayəndələr Xatəmiyə təzyiqlərin tətbiq olunmasını istəsələr də, buna nail ola bilməyiblər. Cümə axşamı Milli Məclisdə hakim partiyanın nümayəndəsi Mehdi Kuçəkzadə bu barədə radikal bəyanat verməyə yenə cəhd göstərsə də, bu, bir çox deputatlar, hətta, hakim partiyanın öz nümayəndələri tərəfindən etirazla qarşılanıb"-deyə, Mürüvvəti əlavə edib.
Onun sözlərinə görə, Xatəmi bir vətəndaş və siyasi fiqur kimi öz fikrini sərbəst demək iqtidarındadır və buna onun qanuni haqqı var.
"Xatəmiyə qarşı radikal qüvvələrin hücum cəhdləri dəfələrlə müşahidə olunub"- deyə, "Müşarikət" (sabiq hakim partiya) Partiyasının Mərkəzi Şurasının üzvü və deputat xanım İlahə Kolayi (Elaheh Koolaee) Trend a bildirib. Onun sözlərinə görə, həm islahatçıların, həm də hakim partiyanın parlamentdə nümayəndələri arasında radikal qüvvələr var, lakin məntiqli və emosiyalara qapılmayan deputatlar da az deyil. "Yeni seçkilərin nəticəsi göstərir ki, növbəti çağırış parlament deputatlarının daha məntiqli, parlamentin tərkibi isə, çoxsaylı partiyalardan ibarət olacaq"-deyə, Tehran Universitetinin professoru Kolayi bu gün Tehrandan telefonla bildirib.
Xatəmi İranın Gilan şəhərində çərşənbə axşamı tələbələrlə görüşündə bildirib ki, hazırda İranın sabiq dini rəhbəri və islam inqilabının təməlini qoyan İmam Xomeyninin düşüncələri və göstərdiyi hədəflər təhrif olunub. O, dolayısıyla hakim partiyanı islami dəyərlərdən süi-istifadə etməkdə günahlandırıb. Parlamentin 77 nümayəndəsi onun bəyanatını ABŞ-ın İrana qarşı yürütdüyü ittihamları təsdiqləməsi kimi dəyərləndirərək, müvafiq orqanların Xatəmi barəsində ölçü götürməsini tələb ediblər. Parlamentə bu barədə verilən təkliflər qızğın mübahisələrdən sonra ləğv olunub.
ABŞ İranı İraq, Əfqanıstan, Livan və Fələstində təxribatlar törətməkdə ittiham edir.
