Azərbaycan, Gəncə, 12 may / Trend , müxbir V.Məmmədov/ Azərbaycanın şimal-qərb bölgəsində polis əməkdaşları tərəfindən 30 kiloqrama yaxın narkotik maddəni satan şəxslər saxlanılıb.
Baş Nakrotiklərlə Mübarizə İdarəsinin qərb bölgəsi üzrə regional şöbəsinin Oğuz rayon Polis İdarəsi ilə birgə keçirdiyi əməliyyat tədbirləri nəticəsində Oğuz rayon sakinləri 47 yaşlı Kamal Əzizov və 38 yaşlı Nəbi Nəbiyev 29,631 kq marixuananı satarkən yaxalanıblar.
Şöbənin rəis müavini Rəfael İsmayılov Trend -a bildirib ki, saxlanılan şəxslər Oğuz-Şəki rayon sərhədində narkotik maddəni 8 min ABŞ dollarına satarkən tutulublar. Aparılan araşdırmalar nəticəsində məlum olub ki, saxlanılan şəxslər uzun müddət narkotik maddələrin alqı-satqısı ilə məşğul olublar.
Narkotik maddəni əldə edən Əzizov onu satmaq üçün digərinə, rayonda bərbər işləyən Nəbiyevə verib. O da bərbərxanada narkotik maddənin 1 qutusunu 50 manata satıb.
Faktla bağlı Cinayət Məcəlləsinin qanunsuz olaraq narkotik vasitələri, psixotrop maddələri hazırlama, satma, istehsal etmə, əldə etmə, daşıma, göndərmə (234.4.2 və 234.4.3) maddələri ilə cinayət işi açılıb.
Məqalə müəllifi ilə əlaqə ünvanı: [email protected]