Azərbaycan, Bakı, 19 may / Trend , müxbir E.Babayev/ Azərbaycanın müxalif Müsavat Partiyası icazəsiz aksiyalar keçirmək məqsədilə, partiyanın rayon təşkilatları ilə birgə müzakirələr başlayıb. Müsavat Partiyası Mərkəzi İcra Aparatının rəhbəri Arif Hacılının bazar ertəsi Trend -a verdiyi məlumata görə, bu barədə qərar partiyanın bu gün keçirilən Divanının iclasında qəbul olunub.
Müsavat Partiyası iki dəfə planlaşdırdığı (mayın 4-də və 18-də) aksiyaları təxirə salıb. Buna səbəb kimi Bakı Şəhər İcra Hakimiyyətinin aksiyaya partiyanın istədiyi yerlərdə (Füzuli meydanı, "Təbriz" (keçmiş "Sevinc") kinoteatrı, Ukrayna meydanı, keçmiş "Qələbə" kinoteatrının qarşısı və "Nərimanov" metrostansiyası qarşısı) yox, "Bibiheybət" qəsəbəsində keçirilməsinə icazə verməsi göstərilib. Bundan əvvəl də Müsavat mayın 4-nə təyin etdiyi aksiyanı eyni səbəbdən təxirə salmışdı.
Hacılı bildirib ki, Divanda sanksiyalaşdırılmamış aksiyalar məsələsi ciddi şəkildə müzakirə edilib. Yekun qərar partiyanın yerli strukturları ilə aparılan müzakirələrdən sonra qəbul ediləcək. "Divanda belə qərar da qəbul edilib ki, hüquqi müstəvidə mübarizə davam etdirilsin. Biz Bakı Şəhər İcra Hakimiyyətini məhkəməyə vermişik. Divanın çıxardığı qərara əsasən, məsələyə ciddi yanaşılacaq və bu iş Avropa İnsan Haqları Məhkəməsinə qədər davam etdiriləcək", - deyə Hacılı bildirib.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
