Azərbaycan, Bakı, 22 may / Trend , müxbir C.Babayeva/ Azərbaycanın müxalif Liberal Demokrat Partiyası (ALDP) xarici dövlətlərin əməkdaşlıq etdiyi siyasi partiyalarını prezident seçkisinə müşahidəçi qismində dəvət edəcək. Partiyanın mətbuat xidmətindən cümə axşamı Trend -a verilən məlumata görə, bu barədə qərar ALDP Aparatının cümə axşamı keçirilən iclasında qəbul olunub.
Azərbaycanda prezident seçkisi oktyabrın 15-də keçiriləcək. Müxalifət düşərgəsindən Müsavat Partiyasının sədri İsa Qəmbər, Demokrat Partiyasının sədri Sərdar Cəlaloğlu, Yaşıllar Partiyasının sədri Mais Güləliyev, "Azərbaycan Naminə" İctimai Forumun prezidenti Eldar Namazov prezident seçkisində iştiraka qərar veriblər. Hakim Yeni Azərbaycan Partiyası seçkidə partiyanın sədri, prezident İlham Əliyevin namizədliyini irəli sürəcəyini bəyan edib. ALDP-nin sədri Fuad Əliyev də prezidentliyə namizədliyini irəli sürüb.
Məlumata əsasən, ALDP müşahidəçiləri Türkiyə, Pakistan, Ukrayna, Rusiya, Belçika, Serbiya, Estoniya, İndoneziya, Belarus və Yaponiyanın əməkdaşlıq etdiyi partiyalarından dəvət etməyi planlaşdırır.
"Xarici ölkə partiyalarının nümayəndələrinin Azərbaycanda keçiriləcək prezident seçkisinə müşahidəçi qismində dəvət olunmasının əsas məqsədi xarici siyasətçiləri seçki prosesi ilə tanış etmək və seçkinin demokratikliyi və şəffaflığını təmin etməkdir", -deyə məlumatda bildirilib.
ALDP 1999-cu ildə yaradılıb.
Məqalə müəllifi ilə əlaqə ünvanı: [email protected]
