Azərbaycan, Bakı, 27 may/ Trend , müxbir A. Qasımova/ Gürcüstan müxalifəti səslərin əksəriyyətini "Vahid Milli Hərəkat"ın qazandığı 21 may seçkilərində məğlubiyyətlə barışmalı olacaq. "Hazırda Gürcüstan iki hissəyə parçalanıb - bir tərəfdə müxalifət, digər tərəfdə isə hökumətdir. Lakin, belə təəssürat yaranır ki, prezident Mixali Saakaşvili və onun ardıcılları hazırda Gürcüstan üçün ən yaxşı seçimdir", - amerikalı professor Ronald Sani hesab edir.
Gürücütan müxalifəti 21 may parlament seçkilərində səslərin 59 faizdən çoxunu qazanmış "Vahid Milli Hərəkat"ı seçkinin nəticələrini saxtalaşdırmaqda ittiham edir. Müxalifət etiraz aksiyaları keçirir və yeni çağırış parlamentdə iştirak etmək niyyətində deyil. Hökumət təmsilçiləri baş tutmuş seçkiləri ədalətli və demokratik kimi qiymətləndirirlər.
"Həm prezident, həm də müxalifət tərəfindən bir çox xətaların edilməsinə baxmayaraq, Gürcüstanda siyasi mübarizə hüquq və demokratiya normalarına uyğun keçir", - ABŞ-ın Miçiqan və Çikaqo universitetlərinin professoru Sani çərşənbə axşamı Trend -a bildirib. Professor hesab edir ki, hər iki tərəf qaydalar üzrə oynasalar və zorakılığa müraciət etməsələr, ölkədəki böhran keçəcək.
Avropa eksperti Svante Kornell (Svante Cornel) hesab edir ki, Gürcüstan müxalifətinin parlament seçkilərinin nəticələrindən narazılığı ölkədə vəziyyətin destabilləşməsinə gətirməyəcək. "Müxalifət kütləvi etiraz aksiyaları üçün kifayət qədər insan toplaya bilməyəcək. Düşünürəm ki, müxalifət hər hansı bir qarışıqlıq təşkil edə bilməyəcək", - C.Hopkins Universiteti (ABŞ) nəzdində Mərkəzi Asiya və Qafqaz İnstitutunun direktoru Kornell telefonla Stokholmdan Trend -a bildirib. Ekspert bildirib ki, müxalifət prezident seçkilərindən sonra iki-üç min adam toplamağı bacarıb. Lakin, indi tamam başqa vəziyyətdir - insanlar siyasətlə maraqlanmaqdan əl çəkiblər, bu onlara maraqlı deyil.
Kornellin sözlərinə görə, müxalifət hələ seçkilərədək bildirmişdi ki, məğlub olduğu halda, seçkiləri saxtalaşdırılmış hesab edəcək. Lakin, onların nəticələrin təhrif edilməsinə dair heç bir faktları yoxdur. "Müxalifətin nəticələri dəyişdirmək imkanı yoxdur. Beynəlxalq müşahidəçilər isə, seçkilərin keçirilmə prosedurunu müsbət qiymətləndiriblər. Sonuncu prezident seçkiləri ilə bağlı da analoji vəziyyət olub. O zaman, müxalifət nəticələrlə də razı deyildi. Lakin bütün beynəlaxlq müşahidəçilər Saakaşvilinin qəbələsini tanındılar", - ekspert bildirib.
Dünən Gürcüstanda müxalifətin kütləvi etiraz mitinqi keçirilib. Mitinqdə təqribən 10 min adam iştirak edib. Mitinqdə çıxış edən natiqlər bildiriblər ki, "Birləşmiş müxalifət, əvvəl olduğu kimi, mayın 21-də baş tutumuş parlament seçkilərinin nəticələrini tanımır və onun işində iştirak etməyə hazırlaşmır". Blok ölkənin qanunverici orqanında 150 yerdən 16 yeri alıb.
