Azərbaycan, Bakı, 09 iyun / Trend , müxbir K.Zərbalıyeva/ Ötən ilin avqustun 6-da itkin düşmüş Dəvəçinin Dağ Bilici kənd sakini 14 yaşlı Nailə Məcidova ilə bağlı Moskvada keçirilmiş məhkəmə tibbi genetik ekspertizanın nəticələri məlum olub.
Baş Prokurorluğun mətbuat xidmətinin rəhbəri Vüqar Əliyev bazar ertəsi Trend -a bildirib ki, ekspertizanın nəticələrinə görə, avqustun 9-da Samur-Abşeron kanalından tapılmış meyitin Nailə Məcidova olduğu təsdiqlənib.
Ötən ilin avqustunda Dağ Bilici kənd sakinləri 7 yaşlı Reyhanə Məcidova və 14 yaşlı Nailə Məcidova itkin düşüb.
Avqustun 9-da Nailə Məcidovaya aid olduğu ehtimal edilən meyit tapılıb.
Mərhumun valideynləri meyidin Məcidovaya məxsus olmadığını əsas gətirərək, eksqumasiya olunmasını tələb ediblər.
Meyit dəfn ediləndən sonra, noyabrın 27-də eksqumasiya edilərək, ekspertizadan keçirilmək üçün Moskva şəhərinə göndərilib.
Fakt üzrə Cinayət Məcəlləsinin qəsdən adamöldürmə (qəsdən adamöldürmə) maddəsi ilə Baş Prokurorluğun Ağır Cinayətlərə Dair İşlər üzrə İstintaq İdarəsindən başlanmış cinayət işinin istintaqı davam edir.
Hadisədə təqsirli bilinən rayonun Dələgah kənd sakinləri Təvəkkül və Elnur İsmayılovlar həbs olunublar.
Müəlliflə əlaqə saxlamaq üçün elektron ünvan - [email protected]