Azərbaycan, Bakı, 12 iyun / Trend , müxbir K.Zərbalıyeva/ Hüquq-mühafizə orqanları tərəfindən müsadirə olunmuş 600 kiloqramdan artıq narkotik vasitə məhv ediləcək.
26 iyun BMT-nin narkotiklərlə mübarizə Günü ərəfəsindəNarkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası iyunun 24-də Neft mədən maşınqayırma zavodunda ötən il müsadirə edilmiş narkotikləri yandıracaq.
Komissiyadan Trend -a bildirilib ki, qanunsuz dövriyyədən çıxarılan narkotik vasitələr arasında həşiş, heroin, marixuana və tiryək üstünlük təşkil edir.
Hüquq-mühafizə orqanları sırasında çəkiyə görə dövriyyədən çıxarılan narkotiklərin böyük qismi MTN-in, fakta görə isə DİN-in payına düşüb.
Komissiyadan bildirilib ki, ölkədə qeydiyyata alınan narkomanların sayı 3 min nəfərdən çox artıb. Ötən il bu göstərici 18 min nəfər idisə, bu il 21 min 80 nəfər olub.
Narkomanlığın gəncləşməsindən narahat olan komissiya narkomaniyanın daha çox respublikanın Astara, Lənkəran, Salyan, Şirvan, Xaçmaz rayonlarında yayıldığını bildirib.
Daxili işlər orqanları tərəfindən bu ilin birinci rübündə qanunsuz dövriyyədən 181 kiloqramdan artıq narkotik vasitə çıxarılıb.
Narkotiklərlə bağlı cinayətlərə görə məsuliyyətə cəlb olunmuş 400 nəfərdən 367-i əmək qabiliyyətli işləməyən və oxumayan, 101-i əvvəllər cinayət törətmiş şəxs, 7-i qadın, 1-i yetkinlik yaşına çatmayan şəxsdir.
Müəlliflə əlaqə saxlamaq üçün elektron ünvan - [email protected]