Azərbaycan, Bakı, 23 iyun/ Trend , müxbir C.Babayeva/ Azərbaycan müxalifəti Milli Məclis tərəfindən əlavə və dəyişikliklərlə qəbul olunmuş Seçki Məcəlləsinin yenidən dəyişdiriləcəyinə ümid edir. Məcəllənin dəyişdirilməsi və prezident seçkisi öncəsi mühitin demokratikləşdirilməsi üzrə addımların mümkünlüyünü müzakirə etmək üçün, müxalifət partiyalarının seçkiyə start verilənədək toplantısı keçiriləcək. "Parlament tərəfindən qəbul olunmuş Seçki Məcəlləsi hələ təsdiq olunmadığından, Avropa Şurasında Azərbaycan üzrə müzakirələrin davam etdiyindən və Avropa Şurası Venesiya Komissiyası Məcəllədən tam razı qalmadığından, Məcəllənin dəyişdirilməsi üzrə müxalifətin cəhdləri davam etdirilməlidir",- deyə bazar ertəsi Trend -a toplantının keçirilməsi təşəbbüsü ilə çıxış etmiş Demokratik Seçki Mərkəzində (DSM) təmsil olunan "Azadlıq" partiyasının sədri Əhməd Oruc bildirib.
Trend -un arayışı: Parlament iyunun 2-də Seçki Məcəlləsinə əlavə və dəyişiklikləri qəbul edib. Yeni layihəyə görə, prezidentliyə namizədlərin depozit qoyma şərti götürülür. Namizədlər yalnız imza toplayacaqlar. Namizədliyin qeydə alınması üçün tələb olunan 45 min imzanın 40 minə endirilməsi nəzərdə tutulur. Seçki təbliğatının müddəti 120 gündən 75 günə endirilir. Məcəllədə dövlət televiziyasında namizədlərə pulsuz efir vaxtı ayrılması qadağan edilib. Təbliğat materiallarının divarlara və obyektlərə vurulması qadağan edilib, bunun üçün xüsusi yerlər ayrılması nəzərdə tutulub. Müxalifətin komissiyaların tərkibinin paritet əsasda formalaşdırılması ilə bağlı təklifi Məcəllədə əksini tapmayıb. Müxalifət əlavə və dəyişikliklərdən narazı qalıb.
Orucun bildirdiyinə görə, bir sıra siyasi partiyalarla artıq görüşlər keçirilib və toplantının reallaşması demokratik qüvvələrin mövqeyindən də asılı olacaq.
Onun sözlərinə görə, DSM bu toplantıda bütün partiyaların iştirakını mütləq hesab etmir. "Resursları tükənmiş və hazırki vəziyyətdə siyasi mübarizə aparmağın perspektivinə inanmayan siyasi təşkilatların bu təşəbbüsə qatılmayacağı gözlənilir. Mühitin demokratikləşməsi uğrunda birləşməyə maraqlı olan qüvvələr bir araya gəlməlidir",- deyə Oruc bildirib.
Trend -un arayışı: Demokratik Seçki Mərkəzində doqquz müxalifət partiyası - Klassik Xalq Cəbhəsi Partiyası, Azadlıq, Milli-Demokrat, Böyük Quruluş, Bütöv Azərbaycan Xalq Cəbhəsi, Böyük Azərbaycan, Açıq Cəmiyyət, Təkamül və Yaşıllar partiyası təmsil olunur.
Məqalə müəllifi ilə əlaqə saxlamaq üçün ünvan - [email protected]