Gürcüstan, Batumi, 01 iyul / Trend , müxbir N.Kirtsxaliya/ Gürcüstanın GUAM-da sədrliyinin prioritetləri beynəlxalq təşkilatlar, ilk növbədə BMT və ATƏT ilə sıx qarşılıqlı münasibətlərin qurulmasından ibarətdir. Bu barədə bu gün Trend -a GUAM-ın Baş katibi Valeri Çeçelaşvili bildirib. "Bunlar yaxın ildə həll edilməli olacaq olduqca mühüm məsələlərdir", - deyə o bildirib.
Bu gün Batumidə keçirilən sammitdə GUAM-da sədrlik rəsmi olaraq Azərbaycandan Gürcüstana keçəcək. GUAM-da hər bir ölkə bir il təşkilata sədrlik edir.
"Fəaliyyətimizin prioritetləri həmçinin GUAM-a üzv ölkələrin ərazilərində dondurulmuş münaqişələrin nizamlanması istiqamətində iş və bu məsələdə beynəlxalq dəstəyi təmin etməkdir", - deyə Çeçelaşvili qeyd edib.
O həmçinin prioritet məsələlər sırasında GUAM ölkələrinin nəqliyyat və tranzit sahələrində əməkdaşlıq etməsi məsələlərinin də yer aldığını qeyd edib. "Biz Xəzər-Qara dəniz regionunda mövcud olan resursları istifadə edərək GUAM-ın daha böyük iqtisadi inkişafına nail olmalıyıq", - deyə Çeçelaşvili əlavə edib.
GUAM-ın formatı 1997-ci ildə Strasburqda Avropa İttifaqının dövlət başçılarının Sammiti zamanı postsovet dövlətləri tərəfindən yaradılıb. 1999-cu ildə bu formata Özbəkistan da daxil olsa da, dörd ildən sonra təşkilatı tərk edib. 2006-cı ildə Kiyevdə ilk sammit zamanı GUAM-ın beynəlxalq təşkilat və "Demokratiya və iqtisadi inkişaf uğrunda təşkilat - GUAM" kimi elan olunması haqda qərar qəbul olunub.
