Azərbaycan, Bakı, 08 iyul / Trend , müxbir D.Xatınoğlu/ İranda iyulun 4 - də Parlamentdə müzakirəyə çıxarılan Cinayət Məcəlləsi layihəsində internetdə "əxlaqsızlıq, ictimai fəsad və dinsizlik" mövzularını yaymağa cəhd göstərən şəxslərin edam cəzasına məhkum olunması nəzərdə tutulub.
"İranda müxalif jurnalistlərin edama məhkum olunmaq təhlükəsi var" - deyə, Fransada fəaliyyət göstərən Sərhədsiz Reportyorlar Birliyi İran bürosunun sədri Rza Moini (Reza Moini) Trend -a açıqlamasında bildirib.
Moininin sözlərinə görə, Parlamentdə müzakirəyə çıxarılan layihə 13 maddədən ibarətdir və onun ikinci maddəsi həmin edam cəzasını nəzərdə tutur. "Bu layihə parlamentdə müzakirəyə çıxarılıb və millət vəkillərinin əksəriyyətinin lehinə səs verməsi ilə təsdiq olunub. Sərhədsiz Reportyorlar Birliyi dərhal bu layihənin əleyhinə bəyanat verib" - deyə Moini bildirib.
Onun dediyinə görə, bəyanatda göstərilir ki, İranda bu tip qanunların qəbul olunmasına ehtiyac yoxdur. Digər tərəfdən, İran hakimiyyəti indiyədək jurnalistlərin bir qismini müxtəlif ittihamlarla ölüm cəzasına məhkum edib.
İyulun 6 - da Tehranın prokuroru Salarkiya mətbuata açıqlamasında bildirib ki, məhkəmənin əxlaqsızlıq, ictimai fəsad və dinsizlik mövzularını yaymaqda günahkar bildiyi internet saytlarınında fəaliyyət göstərənləri edama məhkum etməyə icazəsi var.
İran qanunvericiliyinin 190 - cı maddəsinə əsasən, "əxlaqsızlıq, ictimai fəsad və dinsizlik" ittihamlarına görə edam, qol-qıçın kəsilməsi, sürgün və digər ağır cəzalar tətbiq olunur.
2008 - ci ildə Hiva Butimar, Ədnan Həsənpur adlı iki kürd əsilli jurnalist edama məhkum olunub. İran, edamların sayına görə, dünyada Çindən sonra ikinci yeri tutur.
Müəlliflə əlaqə saxlamaq üçün elektron ünvan [email protected]
