...

ABŞ -ın İraqda qalmaq arzusu yoxdur – ABŞ Müdafiə Nazirliyinin nümayəndəsi

Siyasət Materials 14 İyul 2008 15:47 (UTC +04:00)

Azərbaycan, Bakı, 14 iyul/ Trend , müxbir G.Əhmədova, D.Xatınoğlu/ Pentaqonun rəsmi nümayəndəsi Mark Rayt bəyan edib ki, ABŞ İraqda daimi hərbi bazaların saxlanılması üzrə plan hazırlamayıb. "ABŞ -ın İraqda daimi hərbi bazaların saxlanılmasına dair nə planları, nə də aruzusu var", - Rayt(Mark Wright) Trend -a müsahibəsində bildirib.

Britaniyanın The Guardian qəzeti məlumat verib ki, onun sərəncamına Amerikanın İraqdakı qüvvələrinin perspektivləri ilə bağlı gizli saziş layihəsi düşüb.Layihəyə ABŞ -ın ölkədə vaxt üzrə məhdudiyyətsiz iştirakı ilə bağlı bənd daxildir. Amerika administrasiyası və İraq hökumətinin 7 mart tarixli və məxfilik qrifi ilə nişanlanmış strateji baza sazişi layihəsi BMT-nin mövcud mandatını əvəz etməlidir. O, ABŞ -a "İraqda məhdudiyyətsiz şəkildə hərbi əməliyyatlar aparmağa və təhlükəzlik baxımından həbs olunması tələb olunan şəxslərin saxlanılmasına" icazə verir.

Rayt hesab edir ki, hələ Amerika qüvvələrinin İraqdan çıxarılması qrafiki barədə danışmaq tezdir. Rəsmi Bağdadın rəyinə görə, bu, Vaşinqtonla yeni təhlükəsizlik müqaviləsində öz əksini tapa bilər. "Mən müzakirəsi davam edən məsələni şərh etmək istəmirəm. Lakin ABŞ -ın İraqdakı səfiri Rayan Kroker aydın şəkildə ABŞ -ın "İraqın suverenliyinə" tamamilə hörmət etdiyini bəyan etdiyindən, bu, imzalanacaq istənilən sazişdə öz əksini tapacaq. Saziş tamamilə şəffaf olacaq", - ABŞ Müdafiə Nazirliyi mətbuat xidmətinin nümayəndəsi əlavə edib.

İraqın Baş naziri Nuri Əl-Maliki ötən həftə Vaşinqtona ABŞ qoşunlarının ölkədən çıxarılması qrafikini hazırlamağı və onu iki ölkə arasında yeni təhlükəsizlik müqaviləsinə daxil etməyi təklif edib.

Koalisiya qüvvələrinin İraqın şimalında "Əl-Qaidə" yə qarşı apardığı əməliyyatlara toxunan Rayt bildirib ki, əməliyyatlar hədəfə çatır. "Koalisiya və İraqın təhlükəsizlik qüvvələrinin birgə səylərinin səmərəsi "Əl-Qaidə" və onun İraqdakı üsyançı müttəfiqlərinin dəstək və sığınacağa malik olduğu əyalətlərin sayını azaltmağa davam edir. Xüsusilə də bu fakt diqqəti cəlb edir ki, İraq qüvvələri mayın 10 - da Neynəva əyalətinin təmizlənməsi üzrə əməliyyat aparıb və Mosulda "Əl-Qaidə"nin ocaqlarını dağıdıblar", - ABŞ Müdafiə Nazirliyinin nümayəndəsi bildirib.

Lakin onun sözlərinə görə, "Əl-Qaidə" təhlükəli düşmən olmaqda davam edir. "Bu düşmən koalisiya qüvvələri və İraqın təhlükəsizlik qüvvələrinin az iştirak etdiyi vilayətləri idarə etməyə can atır. "Əl-Qaidə" Mosulda güclü təzyiq altında olduğu üçün, onun Yuxarı Fərat üzrə yenidən qruplaşmağa can atdığına dair əlamətlər mövcuddur", - Rayt bildirib.

Onun rəyinə görə, "Əl-Qaidə" yüksəksəviyyəli hücumlara da qadirdir. "Buna baxmayaraq, qarışıq şəkildə dinc sakinlərin hədəfə alınması "Əl-Qaidə" -ni əhalinin əksəriyyətini təşkil edən sünnilərdən uzaqlaşdırmağa davam edir", - o əlavə edib.

ABŞ və İraq Amerika qüvvələrinin ölkədə gələcək iştirakı üçün hüquqi bazanın təmin edilməsi məqsədilə yeni sazişin imzalanması üzrə məsləhətləşmələr aparırlar. İraqda təhlükəsizliyin təmin edilməsi ilə bağlı BMT-nin ABŞ hakimiyyətinə verdiyi mandat 2008 -ci il dekabrın 31-də başa çatır.

2008 -ci il iyunun 1-də Bağdadda Baş nazir Nuri Əl-Maliki və İraq prezidenti Cəlal Tələbani ilə görüşdə ABŞ səfiri Rayan Kroker təhlükəsizlik sahəsində ikitərəfli əməkdaşlığa dair Amerikanın xarici siyasət idarəsinin mütəxəssisləri tərəfindən hazırlanmış saziş layihəsini, tanış olmaq üçün iraqlılara təqdim edib.

Amerikanın İranla mümkün müharibəsi baş verdiyi halda, ABŞ -ın İraqdakı maraqlarının müdafiəsi haqqında danışan Rayt bildirib ki, Birləşmiş Ştatlar hökuməti İranın nüvə probleminin diplomatik həllinə sadiqdir. Prezident və dövlət departamenti onların bu problemə diqqət yetirməsi üçün, Avropa İttifaqı, MAQATE və BMT-də daxil olmaqla, beynəlxalq ictimaiyyətlə işləyirlər.

Xəbər lenti

Xəbər lenti