Azərbaycan, Bakı, 14 iyul/ Trend , müxbir E.Babayev/ Azərbaycanın müxalif Müsavat Partiyasının seçkidə iştirak edib-etməmək barədə yekun qərarı avqustun 2-də qəbul ediləcək. "Müsavatın Məclisinin iclası avqustun 2-nə təyin edilib və rayon təşkilatlarında seçkidə iştirak edib-etməməklə bağlı müzakirələr, demək olar ki, yekunlaşıb", -deyə bazar ertəsi Trend -a Müsavat Divanının bu gün keçirilən iclasından sonra partiyanın Mərkəzi İcra Aparatının rəhbəri Arif Hacılı bildirib.
Trend -un arayışı: Azərbaycanda prezident seçkisinin oktyabrın 15-də keçirilməsi nəzərdə tutulur. Müsavatın Məclisi 2007-ci ilin dekabr ayında partiyanın başqanı İsa Qəmbərin namizədliyini irəli sürüb. Bu il iyunun 2 - də Milli Məclisdə (parlament) Seçki Məcəlləsinə əlavə və dəyişikliklər qəbul edildikdən sonra, Müsavat seçkidə iştirak qərarını rayon təşkilatlarının müzakirəsinə verib. Müsavat Məcəlləyə dəyişikliklərin seçkinin demokratik keçirilməsinə mənfi təsir edəcəyini iddia edir.
Hacılı bildirib ki, rayon təşkilatlarının seçki ilə bağlı rəyini indidən açıqlamaq çətindir. "İstər rayon təşkilatlarında, istərsə də partiyanın rəhbərliyində müxtəlif fikirlər var" - deyə Hacılı bildirib. Hacılı onu da qeyd edib ki, avqustun 2- də həm də Məclisə boş qalan yerlərə seçkilər keçiriləcək.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
