Azərbaycan, Bakı, 22 iyul/ Trend , müxbir E.Babayev/ Azərbaycanın müxalif Bütöv Azərbaycan Xalq Cəbhəsi Partiyası (BAXCP) prezident seçkisində sona qədər iştirak etməyə bilər. "Birmənalı şəkildə deyə bilmərəm ki, biz hökmən sona qədər seçkidə iştirak edəcəyik", çərşənbə axşamı Trend -a BAXCP sədri, partiyanın prezidentliyə namizədi Qüdrət Həsənquliyev bildirib.
Trend -un arayışı: Azərbaycanda prezident seçkisinin bu il oktyabrın 15-də keçirilməsi nəzərdə tutulur. İyunun 7-də BAXCP-nin qurultayında Həsənquliyevin prezidentliyə namizədliyi irəli sürülüb.
Həsənquliyev bildirib ki, hələlik partiyanın qərarı seçkidə sona qədər iştirak etməkdir. "Amma elə bir vəziyyət yarana bilər ki, seçkidə öz namizədimizlə iştirak qərarı dəyişsin. Yəni müəyyən siyasi qüvvələrlə aparılan danışıqların nəticəsində fərqli qərar meydana çıxa bilər", - deyə BAXCP sədri vurğulayıb. O, indidən hansı hallarda BAXCP-nin qərarının dəyişəcəyi barədə danışmağın tez olduğunu bildirib.
Həsənquliyevin rəhbərliyi ilə Azərbaycan Xalq Cəbhəsi Partiyasının (AXCP) bir qrup üzvü 2002-ci ildə partiyadan ayrılaraq, özlərinin "birləşdirici" qurultayını keçiriblər və 2004-cü ilə qədər AXCP-nin "birləşdirici" qanadı kimi tanınıblar. 2004-cü ildə qurumun adında dəyişiklik edilib və Bütöv Azərbaycan Xalq Cəbhəsi Partiyasının təsis qurultayı keçirilib. 2005-ci ildə dövlət qeydiyyatına alınan BAXCP özünü iqtidara qarşı konstruktiv müxalifətçi hesab edir. Həsənquliyev Milli Məclisin deputatıdır.
Məqalə müəllifi ilə əlaqə ünvanı: [email protected]
