Azərbaycan, Bakı, 30 iyul/ Tr , müxbir E.Babayev/ Azərbaycanın müxalif Müsavat Partiyası seçki bloku yaratmaq niyyətindədir. "Əgər seçkidə iştirak qərarı versək, bu, istiqamətdə real addımlar atıacaq", çərşənbə günü Trend -a Müsavatın Mərkəzi İcra Aparatının rəhbəri Arif Hacılı deyib.
Trend -un arayışı: Azərbaycanda prezident seçkiləri oktyabrın 15-də keçiriləcək. Müsavat Partiyasının Məclisi ötən ilin dekabr ayında 2008-ci il seçkilərində iştirak qərarı verib və partiyanın başqanı İsa Qəmbərin namizədliyini irəli sürüb. İyunun 2-də Seçki Məcəlləsinə əlavə və dəyişikliklər edildikdən sonra Müsavat bu dəyişikliklərdən narazı olduğunu bəyan edib və seçkidə iştirak qərarını yenidən müzakirəyə çıxarıb.
Hacılı xatırladıb ki, avqustun 2-də Müsavatın Məclisi seçkidə iştrak edib-etməməklə bağlı yekun qərar verəcək. "Əgər biz seçkidə iştirak qərarı versək və İsa Qəmbərin prezidentliyə namizədliyi rəsmiləşsə müəyyən siyasi partiyaları, ictimai təşkilatları onun ətrafına yığmaq çətin olmayacaq", - deyən Hacılı artıq müəyyən partiyaların Qəmbərin namizədliyini müdafiə etmək niyyətində olduqlarını Müsavat rəhbərliyinə bildirdiklərini deyib. "Mən ididən həmin partiyaların adını çəkmək istəmirəm. Çünki bizim seçki ilə bağlı mövqeyimiz hələ tam dəqiqləşməyib", - deyə o vurğulayıb.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
