Azərbaycan, Bakı, 04 avqust / Trend , müxbir E.Babayev/ Müxalif Azərbaycan Milli İstiqlal Partiyasının (AMİP) Bakı Şəhər İcra Hakimiyyətinə (BŞİH) qarşı iddiası yenidən icraata götürülüb. Bu barədə bazar ertəsi Trend -a AMİP-in sədr müavini Əli Orucov məlumat verib.
AMİP keçən ilin sonunda BŞİH-nin sərbəst toplaşmaq hüququnu məhdudlaşdırdığını iddia edərək, bu hüququn təmin olunması iddiası ilə Səbail rayon məhkəməsinə müraciət edib. Partiyanın iddiası təmin olunmamışdı və AMİP yuxarı məhkəmə instansiyalarına müraciət etmişdi. Bir ay bundan öncə Bakı Apellyasıiya Məhkəməsi işə yenidən baxılması üçün işi Səbail rayon məhkəməsinə qaytarıb.
Orucov bildirib ki, proses bir növ yenidən başlayır və avqustun 8-də partiyanın BŞİH-yə qarşı iddiasına yenidən baxılacaq.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir.
Məqalə müəllifi ilə əlaqə ünvanı: [email protected]
