Azərbaycan, Bakı, 06 avqust/ Trend müxbir R.Novruzov/ ATƏT-in Demokratik İnstitutlar və İnsan Hüquqları üzrə Bürosu (DİİHB) müxalifətin Azərbaycanda prezident seçkilərini boykot etməsinin səbəblərini öyrənməyə hazırdır.
"Biz Azərbaycana gəlmək və demokratik seçkilərə dair zəruri araşdırmalar aparmağa hazırıq. Azərbaycan bildirib ki, seçkilər rəsmən başlayanda, bizi monitorinq üçün dəvət edəcəklər", - DİİHB-nin nümayəndəsi Jans-Haqen Eşenbaher çərşənbə günü Varşavadan telefonla Trend -a bildirib.
Onun sözlərinə görə, DİİHB-in müxalifət partiyalarının seçki kampaniyasının qaydalarını pisləyən bəyanatları barədə məlumatı var və bu bəyanatların doğru olub -olmadığını öyrənmək niyyətindədir.
Eşenbaherin sözlərinə görə, Büro Azərbaycanda oktyabrın 15 - də keçiriləcək prezident seçkilərinin monitorinqini aparacaq.
İniyədək Azərbaycan prezidenti vəzifəsinə "Yeni Azərbaycan" partiyasının sədri İlham Əliyev, "Müasir Müsavat" partiyasının sədri Hafiz Hacıyev, , "Ümid" partiyasının sədri İqbal Ağazadə, Azərbaycanın Liberal-Demokrat Partiyasının sədri Fuad Əliyev və Yaşıllar Partiyasının sədri Mais Güləliyevin namizədliyini irəli sürüb. Müsavat, Klassik Xalq Cəbhəsi partiyaları və Demokrat Partiyası prezident seçkilərində iştirak etməmək barədə qərar qəbul ediblər.
Müəlliflə əlaqə saxlamaq üçün elektron ünvan: [email protected]
