Azərbaycan, Bakı, 13 avqust / Trend , müxbir E.Babayev/ Müxalif Azərbaycan Xalq Cəbhəsi Partiyasının (AXCP) Ali Məclisinə yeni sədr seçilməsi partiyanın qurultayına qədər təxirə salına bilər. "Biz çalışırıq ki, bu ilin sonuna kimi qurultayımızı keçirək. Qurultayda Ali Məclis üzvləri yenidən seçiləcək və bu baxımdan, Ali Məclisə sədr seçkisi qurultayda baş tuta bilər" - deyə çərşənbə günü Trend -a AXCP-nin sədr müavini Fuad Müsatafayev bildirib.
AXCP-nin Ali Məclisinin sədri Qulamhüseyn Əlibəyli ötən həftənin cümə günü partiyadan və tutduğu vəzifədən istefa verib.
Müstafayev bildirib ki, Əlibəylinin istefası partiyanın Ali Məclisinin işinə ciddi təsir göstərə bilməz. Onun sözlərinə görə, Ali Məclisin sədr müavinləri var və onlar müvafiq işləri həyata keçirəcəklər. "Hazırda bu vəzifəyə iddialılar yoxdur. AXCP-nin kifayət qədər kadr potensialı var və Ali Məclisin 100 - dən çox üzvündən biri bu vəzifəyə təyin olunacaq" - deyən Müstafayevin sözlərinə görə, prosedura əsasən, Ali Məclisin növbəti iclası gələn ay keçirilməlidlir. Lakin partiyanın qərargahı olmadığından, Ali Məclisin keçirilməsi üçün yer yoxdur.
Müxalifəti təmsil edən AXCP hazırda "Azadlıq" siyasi blokunun üzvü və həmtəsisçisidir. Partiyanın qurucusu və 2000 - ci ilədək sədri Azərbaycanın eks-prezidenti mərhum Əbülfəz Elçibəy olub. 2000 -ci ildən indiyədək AXCP-yə keçmiş dövlət katibi, sabiq deputat Əli Kərimli sədrlik edir.
Məqalə müəllifi ilə əlaqə ünvanı: [email protected]