İran, Tehran, 13 avqust / Trend , müxbirlər R.Azadbəxş, D.Xatınoğlu/ İran rəsmilərinin yeni hərbi texnologiyaya və təchizata yiyələndikləri və bu sahədə sürətlə inkişaf etdikləri barədə verdiyi davamlı bəyanat, düşmənləri qorxutmaq və müharibədən yayınmaq məqsədi daşıyır. " İranın yeni hərbi təchizatla bağlı məlumat müharibədən yayınmaq üçündür "-deyə, adının çəkilməsini istəməyən İran Müdafiə Nazirinin sabiq rəsmisi Trend -un Tehrandakı müxbirinə bildirib.
İranın müdafiə naziri Mustafa Məhəmməd Nəccar avqustun 12-də mətbuata açıqlamasında bildirib ki, radardan yayınma qabiliyyətinə malik gəmi və özü idarə olunan sualtı qayıq ölkə mütəxəssisləri tərəfindən layihələşdirilib və istehsal olunub. O, əlavə edib ki, belə bir gəminin və sualtı qayığın istehsalı ölkənin müdafiə gücünü artıracaq.
İranın Müdafiə Nazirliyinin sabiq rəsmisi çərşənbə axşamı bildirib ki, İran hərbi sahədə yeni nailiyyətlər əldə edib və bu ölkə Orta Şərq ölkələri arasında güclü orduya malikdir. İranın bəzi region ölkələrinə silah satması ölkənin hərbi sahədə inkişafının göstəricisidir - deyə Müdafiə nazirliyinin sabiq rəsmisi avqustun 13-də bilidirb.
İranın müdafiə nazirliyinin sabiq rəsmisi hesab edir ki ki, əvvəllər İranda istehsal olumuş bəzi avadanlıqlar onların xaricdə istehsal olmuş oxşarların surətidir, amma hazırda İranlı mütəxəssislər hərbi sahədə yeni texnologiyaları özləri layihələşdirib istehsal edirlər.
İran İnqalab Keşikçiləri Korpusunun (Sepah) qurucalarından olan Möhsün Sazegara bu haqda Trend -a açıqlamasında bildirib ki, İran, həqiqətən, hərbi sahədə nailiyyətlər qazana bilib, lakin İranın ən modern və anoloqu olmayan silahların istehsalı haqda məlumatları şişirtmədir.
Hazırda Vaşınqtonda fəaliyyət göstərən iranlı ekspert bu gün telefonla bildirib ki, İran Qərbi müharibədən çəkindirmək üçün belə edir, yoxsa İranın hərbi təchizatı Qərblə müqayisədə çox zəifdir. "İran bundan əvvəl iddia etdi ki, 2000 km məsafədə hədəfi vuran raket istehsal edib. Bu raketlərin 2000 km məsafəni vura bilməsi inandırıcı deyil, başlığının partlayıcı maddəsi isə, bir binanı dağıdacaq gücdə deyil"-deyə, Müasir İran Tədqiqat Mərkəzinin sədri Sazegara hesab edir.
İranın Müdafiə Nazirliyinin rəsmisi bildirib ki, İranda hərbi sahədə əldə olunmuş son nailiyyətlər İran düşmənlərini düşünməyə vadar edir. Onun sözlərinə görə, düşmənlər İrana hücum planlarını və müharibə istəklərini kənara qoymağa məcbur olurlar, "hazırda region müharibəyə hazır deyil, İrana qarşı hər hansı bir hərbi əməliyyatın nəticəsi aydın deyil və İran düşmənləri də bundan qorxurlar" - deyə İran rəsmisi bildirib.
Onun fikrincə, düşmənlərin İrana qarşı güclü təbliğatı getdiyi bir zamanda İranda əldə olunan hərbi nailiyyətlərin açıqlanması, İran inqilabçılarını ruhlandırır və İran ictimaiyyətinə müsbət təsir göstərir.
İran keçən ay uzaq mənzilli "Şəhab 3" raketini sınaqdan keçirib. Bu raket iki min km məsafədən hədəfi vura bilir. ABŞ "Şəhab 3" raketinin sınağından bir saat sonra İrandan sınaqların dayandırmasını tələb edib. İran son bir ildə, davamlı olaraq yeni hərbi texnologiyalar istehsal etdiyinə dair bəyanat verir. 1992-ci ildən indiyədək İran yeni təyyarə, raket, tank və hava hücumundan müdafə qurğuları istehsal edib.
