Azərbaycan, Bakı, 10 sentyabr / Trend , müxbir İ.Əlizadə/ Azərbaycanda keçiriləcək prezident seçkisini boykot edən müxalifət qüvvələrinin yaratdığı koalisiya seçki ilə bağlı vəziyyəti dəyişə və nəticələrə təsir edə bilməyəcək.
"Amma siyasət prezident seçkisindən sonra da davam edəcək, prezident seçkisindən sonra bələdiyyə seçkisi gəlir və müxalifətin 2008-ci ildən sonrakı taleyi baxımından koalisiyanın yaradılması çox mühüm addımdır", çərşənbə günü Trend -a müxalifətyönlü "Yeni Müsavat" qəzetinin baş redaktoru Rauf Arifoğlu bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. Bir qrup müxalifət partiyası seçkini boykot edir. Seçkini boykot edən Milli Birlik Hərəkatının lideri Lalə Şövkət, "Azərbaycan Naminə" İctimai Forumun prezidenti Eldar Namazov, Azərbaycan Xalq Cəbhəsi Partiyasının sədri Əli Kərimli, Müsavat Partiyasının başqanı İsa Qəmbər, Vətəndaş və İnkişaf Partiyasının sədri Əli Əliyev sentyabrın 5-də prezident seçkisi ilə bağlı birgə bəyanat imzalayıblar.
KXCP sənədin hazırlanması ilə bağlı məsləhətləşmələrdə iştirak etsə də, birgə bəyanatı imzalamayıb.
Arifoğlu qeyd edib ki, koalisiyanın yaradılması eyni zamanda, bir qədər gec baş tutub. O deyib ki, bir müddət əvvəl Müsavat, Xalq Cəbhəsi və Klassik Xalq Cəbhəsi partiyaları əsas olmaqla müxalifətin geniş birliyinin yaradılması təklifi ilə çıxış edib: "Lakin seçkini boykot edən deyil, prosesdə iştirak üçün birliyin yaradılmasını təklif etmişdim".
Onun fikrincə, koalisiyanın effektiv fəaliyyət göstərməsi üçün onun genişləndirilməsinə ehtiyac var. "Bu, müxalifətin birliyinin yaradılması istiqamətində atılan ilk addımdır və müsbət tendensiyadır. Yaxşı olardı ki, real strukturlara malik bir necə təşkilat, ilk növbədə isə Klassik Xalq Cəbhəsi Partiyası və cəmiyyətdə tanınan bir sıra şəxslər koalisiyaya daxil olsun", - o bildirib.
Arifoğlu deyib ki, yeni koalisiyanın prezident seçkisinə qədər bir dəfə kütləvi aksiya keçirməklə bağlı hakimiyyət orqanlarına müraciət etməsi və bunun baş tutması vacibdir. O qeyd edib ki, yeni birliyin Bakı da daxil olmaqla, bütün ölkə üzrə yaradılması və rayonlarda yerli koalisiyaların formalaşdırılmasına ehtiyac var.
"Birliyə daxil olan təşkilatların liderlərinin rayonlara səfərini təşkil etmək yaxşı olardı. Bu hadisə yeni prosesin başlaması olardı. Bunlar həyata keçirilərsə, seçki ərəfəsində və sonrakı dövrdə narazı elektoratı yenidən bu koalisiya ətrafında birləşdirmək, struktur halına gətirmək mümkün olar", - deyə baş redaktor əlavə edib.
Məqalə müəllifi ilə əlaqə ünvanı: [email protected]
