Azərbaycan, Bakı, 10 oktyabr/ Trend , müxbir E.Tariverdiyeva/Ukrayna prezidenti Viktor Yuşşenko növbədənkənar parlament seçkiləri ilə bağlı fərmanla Yuliya Timoşenkonun mövqeyini zəiflətməyə çalışaraq, özündən asılı olmayaraq, özünün əzəli rəqibi Viktor Yanukoviçin Baş nazir vəzifəsinə gəlməsinə şərait yaradıb.
"Növbəti növbədənkənar seçkilər - Yuşşenko və onun partiyası üçün özünəqəsddir. İndi onun partiyası Yanukoviçin partiyası kimi güclü deyil", - Trend -a Chatham Britaniya analitik mərkəzinin Ukrayna üzrə eksperti Endrü Uilson (Andrew Wilson) telefonla deyib.
Bu gün Ukrayna prezidentinin Ali Radanın buraxılması və növbədənkənar seçkilərin keçirilməsi ilə bağlı Fərmanın qüvvəyə minməsi, sentyabrın əvvəlində prezidentmeylli "Bizim Ukrayna - Xalq Özünümüdafiəsi" və Yuliya Timoşenko Bloku koalisiyasının dağılmasından sonra yaranmış siyasi böhrana nöqtə qoyub. Buna Timoşenko blokundan olan deputatların müxalif Regionlar partiyası və kommunistlərlə birgə prezidentin səlahiyyətlərini məhdudlaşdıran bir neçə qanun layihəsinə səs verməsi səbəb olub.
"Regionlar partiyası dəfələrlə Yuşşenkonu Radanı buraxmaq niyyətinə görə tənqid edib, lakin bu gün onlar növbədənkənar seçkilərə tərəfdar çıxıblar.
Prezident Yuşşenko növbədənkənar parlament seçkilərini təyin etməklə, özündən asılı olmayaraq, özünün prezident seçkiləri üzrə əzəli rəqibi və keçmiş Baş nazir Yanukoviçə "yaşıl işıq"yandırıb.
Rusiyalı politoloq Qriqori Trofimçuk hesab edir ki, Yanukoviç çox güman ki, Baş nazir olacaq. Məhz bu məqsədlə bütün bunlar Rada tərəfindən sövq edilib. Yanukoviçin partiyası Radada ən güclü mövqelərdən birini tutur.
"Bütün bunlar ona doğru gedir ki, Yanukoviç və onu dəstəkləyən qüvvələr taktiki gediş edərək, parlament hakimiyyətinə gələcəklər", - Trend -a Rusiya Strateji İnkişafın Modelləşdirilməsi Mərkəzinin vitse-prezidenti Trofimçuk bildirib.
Ukraynalı ekspert Andrey Yermolayev Ali Radada gələcək koalisiyada başlıca rolu Regionlar partiyasında görür ki, bu da Yanukoviçə Baş nazir kreslosunu yüz faiz təmin edir.
Yermolayev hesab edir ki, mümkün koalisiya Regionlar partiyası, Litvinin Bloku və Kommunist partiyası ola bilər.
"Ali Radada qüvvələrin yerləşməsi yəqin ki, dəyişəcək və Regionlar partiyasının əsas rol oynayacağı koalisiyanın yaradılacağına daha çox ehtimal var", - Trend -a "Sofiya" Ukrayna Sosial Tədqiqatlar Mərkəzinin prezidenti Yermolayev bildirib.
Lakin Regionlar Partiyasının iştirakı ilə koalisiya başqa konfiqrurasiyada yaradılsa, namizədlərin irəli sürülməsi mərhələsində Yanukoviçin Baş nazir vəzifəsinə namizədliyi daha çox ehtimal edilən olacaq, - ekspert hesab edir.
Indi müxalif Regionlar partiyası parlamentdə ən böyük fraksiyadır və o, 450 yerdən 175-nə sahibdir.
Lakin analitiklər Radanın buraxılmasına baxmayaraq, indiki Baş nazir Timoşenkonun da hakimiyyətdə qalmaq imkanı olmasını istisna etmirlər.
Uilsonun sözlərinə görə, Timoşenko təcrübəli siyasətçidir və heç nəyə baxmayaraq, o, yeni parlamentdə də Baş nazir qala bilər. Uilsonun fikrincə, Timoşenkonun partiyası xalq arasında məşhurdur.
Ekspertlərin fikrincə, parlament koalisiyasının tərkibi və müxtəlif partiyalardan olan deputatların sayı inanılmaz şəkildə dəyişəcək.
Yermolayevin sözlərinə görə, Timoşenko partiyasının nəticələri daha nəzərəçarpacaq olacaq, belə ki, ölkədəki iqtisadi vəziyyət və maliyyə durğunluğu bu qüvvəyə qarşı işləyəcək.
Ekspert hesab edir ki, prezidentin bloku ,çox güman ki, parlamentə keçəcək, lakin onun nəticələri ötən ilkindən xeyli aşağı olacaq.
"Laki əsas odur ki, bütün bunlar artıq keçilmiş mərhələdir və yeni heç nə yoxdur. Hər şey Ukrayna və onun xalqı üçün ciddi sarsıntı ilə bitəcək siyasi vakuuma bənzər bir şeyə doğru gedir", - Trofimçuk vurğulayıb.
Materialın hazırlanmasında Z.Novosvitski (Kiyev), R.Ağayev (Moskva) iştirak ediblər.