Azərbaycan, Bakı, 24 oktyabr / Trend müxbir A.Hüseynbala/ "Azərbaycan Naminə" İctimai Forum Azərbaycan müxalifətini radikal mövqedə olmamağa çağırır.
"Müxalifət real vəziyyətə adekvat qiymət verməlidir. Biz heç bir əsası olmayan məsələlərdə düşmənçilik nümayiş etdirməməliyik. Eyni zamanda ciddi problemləri ört-basdır etmək də düzgün yol deyil" cümə günü Trend -a Müxaliətin Əməkdaşlıq Mərkəzinə (MƏM) daxil olan "Azərbaycan Naminə" İctimai Forumun rəhbəri Eldar Namazov bildirib.
Trend -ın arayışı: Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiaysı və "Azərbaycan Naminə" İctimai Forum (ANİF) daxildir. Sentyabrın əvvəlində bu siyasi təşkilatlar oktyabrın 15 - də keçirilən prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri - legitim elan edilib.
Namazovun sözlərinə görə, Azərbaycan müxalifəti ilə hakimiyyət arasındakı indiki münasibətlərə beynəlxalq təcrübə prizmasından yanaşmaq lazımdır.
"Biz dünya təcrübəsində çox vaxt görürdük ki, bir-biri ilə illərlə çox ciddi mübarizə aparan qüvvələr nə vaxtsa bir masa arxasında oturub, ölkənin gələcəyini müzakirə edirlər" - Namazov xatırladıb.
ANİF rəhbəri deyib ki, Azərbaycanda da müxalifətlə iqtidar ölkənin gələcəyi ilə bağlı məsələləri müzakirə edə bilər.
"Məsələn, biz hakimiyyətlə Qarabağ münaqişəsi, dünyada indi cərəyan edən iqdisadi böhranın Azərbaycan üçün gözlənilən təhlükəsi kimi problemləri bir masa arxasında oturub, müzakirə etməyə hazırıq", - Namazov bildirib.
Namazovun fikrincə, prezident seçkisinə verilən qiymət hakimiyyətlə müxalifətin əməkdaşlığına, yaxud dialoquna mane ola bilməz.
"Mane olacaq yeganə məsələ siyasi iradədir. Əgər siyasi iradə ortaya qoyularsa, iqtidar-müxalifət dialoqu 24 saat ərzində baş tuta bilər" - müxalif hərəkatın rəhbəri vurğulayıb.
Məqalə müəllifi ilə əlaqə ünvanı: [email protected]
