Azərbaycan, Bakı, 24 oktyabr/ Trend , müxbir İ.Əlizadə/ Azərbaycan müxalifətini təmsil edən Müsavat Partiyasının üzvü, "Yeni Müsavat" qəzetinin baş redaktoru Rauf Arifoğlu partiyanı məhkəməyə vermək niyyətindən imtina edib.
"Müsavat Partiyasının Avropa Liberal-Demokrat İslahatçı Partiyalar İttifaqına üzv olması ilə bağlı qərarın ləğv olunması üçün tamamilə başqa bir variant nəzərdə tuturam və məhkəməyə belə tələsik müraciət etmək niyyətim yoxdur", - bu barədə cümə günü Trend -a Arifoğlu bildirib.
Trend -un arayışı: Müsavat Məclisi 2006-cı il dekabrın 23-də partiyanın Avropa Liberal-Demokrat İslahatçı Partiyalar İttifaqına (ALDİPİ) üzv olması haqqında qərar qəbul edib. ALDİPİ-nin 2007-ci ilin oktyabrın 18-də Berlində keçirilən qurultayında Müsavat Partiyası bu quruma üzv qəbul olunub.
Arifoğlu bunun əleyhnə çıxıb və Müsavatın ALDİPİ-ya üzv olmasının Nizamnamə, Məramnamə və Proqrama uyğun olub-olmaması məsələsinin araşdırılması üçün ərizə ilə partiyanın Mərkəzi Nəzarət-Təftiş Komissiyasına müraciət edib. Komissiya Müsavatın ALDİPİ-yə üzv olmasının partiyanın Nizamnamə, Məramnamə və Proqramına zidd olmadığı haqda qərar qəbul edib və Arifoğlunun iddiasını təmn etməyib.
Arifoğlu bununla razılaşmayaraq, prezident seçkisindən sonra qərarın ləğv olunması üçün məhkəməyə müraciət edəcəyini bildirmişdi.
Sağ-mərkəzçi, millətçi Müsavat Partiyası 1911-ci ilin oktyabrında Bakıda yaradılıb. Müsavat Partiyasının III (Bərpa) Qurultayı 1992-ci il noyabrın 7-də Bakıda Respublika sarayında keçirilib. Gizli səsvermənin yekunları əsasında İsa Qəmbər əksəriyyət səslə Müsavat Partiyasının başqanı seçilib.
Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya parlamentdə dörd nəfər deputatla təmsil olunur.
"Prezident seçkisindən hələ on gün keçir. Eyni zamanda, indi ölkədə elə bir vəziyyətdir ki, məhkəməyə müraciət etməklə həmin məsələni gündəliyə gətirməyə ehtiyac görmürəm. Gündəlikdə tamamilə başqa məsələlər var", - deyə o əlavə edib.
Arifoğlu qərarın ləğv olunması ilə bağlı başqa variantlarının nədən ibarət olduğunu açıqlamayıb.
"Mən indi də hesab edirəm ki, Müsavatın Avropa Liberal-Demokrat İslahatçı Partiyalar İttifaqına üzv olması partiyanın klassik və müasir ideoloji kursuna tamamilə ziddir. Bu çox ciddi səhvdir. Bunun ləğv olunması ilə bağlı düşüncələrim var. Məhkəməyə müraciət etməyə də bilərəm", - deyə baş redaktor vurğulayıb.
Məqalə müəllifi ilə əlaqə ünvanı: [email protected]
