Azərbaycan, Bakı, 10 noyabr / Trend , müxbir A.Hüseynbala/ Azərbaycanın müxalif partiyası bir şəxsin iki müddətdən artıq prezident seçilməsinə qoyulan məhdudiyyətin ləğvini mümkün hesab edir.
"Prezidentin səlahiyyət müddətinin artırılması vaxtından əvvəl qaldırılan məsələ olsa da, vaxtı çatanda referendum yolu ilə Konstitusiyaya dəyişiklik edilə bilər", - bazar ertəsi Trend -a müxalif Tərəqqi Partiyasının sədri Çingiz Dəmiroğlu bildirib.
Trend - un arayışı: Azərbaycan Konstitusiyasının 101-ci maddəsinin 5-ci bəndinə əsasən, heç kəs iki dəfədən artıq təkrarən prezident seçilə bilməz. Prezidentin səlahiyyət müddəti beş ildir.
Hakim Yeni Azərbaycan Partiyasının (YAP) icra katibinin müavini Siyavuş Novruzov ötən həftə Trend -a açıqlamasında prezidentin səlahiyyət müddətinin uzadılması təklifi ilə çıxış edib.
Rusiyanın dövlət başçısı Dmitri Medvedyev ötən həftə Federal Şuraya ilk müraciətində prezidentin səlahiyyət müddətinin dörd ildən altı ilə, parlamentin səlahiyyət müddətinin dörd ildən beş ilə qədər artırılmasını təklif edib. Bəzi ekspertlər hesab edirlər ki, Azərbaycanda da prezidentin səlahiyyət müddətinin artırılmasına və bir nəfərin iki dəfədən artıq prezident seçilməsi qadağasının ləğv olunmasına ehtiyac var.
Dəmiroğlunun sözlərinə görə, prezidentin səlahiyyət müddətinin artırılması məsələsini indidən gündəmə gətirmək tələsik addımdır.
"Oktaybrın 15-də keçirilən prezident seçkisində İlham Əliyev daha beş il fəaliyyət göstərmək şansı qazanıb. Dövlət rəhbəri əvvəlki beş ildəki kimi problemlərin sürətli həllinə nail olacaqsa, 2013-cü ildə yenidən prezident seçilməsi üçün məhdudiyyətin aradan qaldırılması zərurətə çevrilə bilər", - Dəmiroğlu vurğulayıb.
"İlham Əliyev birinci müddətə prezident kimi fəaliyyəti ilə alternativsizliyini sübut edib. Azərbaycan sürətlə inkişaf edib, böyük uğurlar qazanıb. Ona görə bir şəxsin iki müddətdən artıq seçilməsinə qoyulan qadağanın ləğvinin tərəfdarıyam", - bazar ertəsi Trend -a iqtidaryönlü Ana Vətən Partiyasının sədri, deputat Fəzail Ağamalı söyləyib.
Ağamalının sözlərinə görə, İlham Əliyev artıq Azərbaycanın yeni əsrdəki yeni lider statusunu qazanıb. "İlham Əliyevin ikinci prezidentlik müddəti başa çatanda 52 yaşı olacaq. Ömrünün ən yetkin vaxtında Azərbaycanın beynəlxalq nüfuzunu günü-gündən artıran siyasətçinin yenidən prezident seçilməsinə imkan verməmək haqsızlıq olardı", - Ana Vətən Partiyasının sədri bildirib.
"Bir şəxsin prezidentliyi üçün Konstitusiyada təsbit olunan məhdudiyyətin ləğvi məsələsinin indidən gündəmə gətiriləməsi səhv addımdır", - bazar ertəsi Trend -a müxalif Vəhdət Partiyasının sədri Tahir Kərimli deyib.
Onun sözlərinə görə, bu təklifin prezident İlham Əliyevin xeyrinə olub-olmayacağını düşünmək lazımdır. "Dövlət başçısı təklifə rekasiya vermədiyindən, konkret fikir söyləmək çətindir. Məncə, Konstitusiya normalarının əleyhinə çıxmaq dövlətin imicinə zərər vura bilər", - Kərimli vurğulayıb.
Məqalə müəllifi ilə əlaqə ünvanı: [email protected]
