Azərbaycan, Bakı, 14 noyabr / Trend , müxbir K. Zərbalıyeva / Azərbaycanda narkotiklərin qaçaqmalçılığında ittiham olunan yüksək vəzifə tutmuş şəxslərin övladlarından ibarət mütəşəkkil dəstənin üzvlərinin cinayət işi üzrə məhkəmə baxışı keçirilib.
Xalq artisti İlhamə Quliyevanın oğlu Orxan Nadirov, Bakı şəhərinin sabiq prokuroru Ədalət Mirsalamovun, Əzizbəyov rayonunun sabiq prokuroru Rəşid Həsənovun övladları Mahir Mirsalamov və Yalçın Həsənov və daha 11 nəfərin cinayət işi üzrə cümə günü keçirilən prosesdə dövlət ittihamçısı ittiham aktını elan edib.
Orxan Nadirov, Mahir Mirsalamov, Yalçın Həsənov, Elşən Rüstəmov, Əli İsmayılov, Zubiyə Qulami, Vüqar Əliyev, Cavidan Əliyev, Ramin Həsənov, Kamilə Eyvazova, Elşən Budaqov, Həsən Həsənov, Mirəli Əliyev Cinayət Məcəlləsinin qaçaqmalçılıq (206 - cı), satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama (234.1- ci ) və qabaqcadan əlbir olan bir qrup şəxs tərəfindən və ya mütəşəkkil dəstə tərəfindən qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma (234.4.1 - ci) maddələri ilə ittiham olunurlar.
Təqsirləndirilən şəxslər bu ilin mayında Milli Təhlükəsizlik Nazirliyinin keçirdiyi əməliyyat nəticəsində həbs ediliblər. Onlardan narkotik vasitə olan "ekstazi" aşkarlanıb.
Nadirov və Mirsalamov özlərini elan olunan ittihamda təqsirli bilməsələr də, digərləri qismən təqsirli biliblər.
Günün ikinci yarısında Mirsalamov və Həsənov ifadə veriblər.
Mirsalamov bu işlə heç bir əlaqəsi olmadığını deyib.
Həsənov isə, ekstazini satmaq üçün deyil, özünün istifadəsi üçün aldığını bildirib.
Proses noyabrın 19 - da digər təqsirləndirilənlərin ifadəsi ilə davam etdiriləcək.
Məqalə müəllifi ilə əlaqə ünvanı:[email protected]
