Azərbaycan, Bakı, 18 noyabr / Trend / Xəzər dənizinin hüquqi statusu Azərbaycan və İran Xarici İşlər nazirliklərinin işçi qruplarının çərşənbə axşamı Tehranda keçiriləcək görüşündə müzakirə olunacaq, - Azərbaycanın İrandakı səfiri Abbasəli Həsənov Trend -a telefonla xəbər verib.
Azərbaycanı görüşdə xarici işlər nazirinin müavini Xələf Xələfov təmsil edəcək.
"Əminəm ki, bu görüş Xəzərin statusunun müəyyənləşməsi üçün yeni impuls verəcək", - Həsənov deyib.
SSRİ dağılandan sonra Xəzərin statusu uzun müddət neft və qaz yatağı ehtiyatlarının, eyni zamanda bioloji ehtiyatların bölünməsilə bağlı fikir ayrılıqlarının predmeti kimi həll olunmamış qalıb və qalmaqdadır. Uzun müddət ərzində Xəzəryanı dövlətlərlə Xəzər dənizinin statusuna dair danışıqlar aparılıb - Azərbaycan, Qazaxıstan və Rusiya Xəzərin orta bölünmə xəttinin təyin olunmasında israrlıdırlar. İran və Türkmənistan Xəzərin Xəzəryanı dövlətlər arasında beşdə bir hissəyə bölünməsinin tərəfdarıdır. 2003-cü ildə Rusiya, Azərbaycan və Qazaxıstan Xəzər dənizinin orta xətt üzrə hissələrə bölünməsi barədə razılaşma imzalayıblar.
Həsənovun sözlərinə görə, Azərbaycan xarici işlər naziri müavininin İrana səfəri çərçivəsində eyni zamanda ölkələrimiz arasındakı iktərəfli məsələlər müzakirə olunacaq.
Müəlliflə əlaqə ünvanı: [email protected]
