Azərbaycan, Bakı, 12 dekabr / Trend , müxbir İ.Əlizadə/ Azərbaycanın Türkdilli Ölkələrin Parlament Assambleyasındakı nümayndə heyəti parlamentin payız sessiyasında formalaşdırılacaq. "Nümayəndə heyəti formalaşdırılan zaman ilk növbədə orada təmsil olunacaq deputatların buna istəklərinin olması nəzərə alınacaq", -bu barədə cümə günü jurnalistlərə Azərbaycan Milli Məclisi Aparatının rəhbəri Səfə Mirzəyev bildirib.
Trend -un arayışı: Noyabrın 21-də İstanbulda türkdilli ölkələrin parlament sədrlərinin görüşü keçirilib. Görüşdə Parlament Assambleyasının yaradılması məsələsi müzakirə olunub və saziş imzalanıb. Sazişi Azərbaycan, Türkiyə, Qazaxıstan və Qırğızıstanın parlament sədrləri imzalayıb. Türkmənistan və Özbəkistan Assambleyada təmsil olunmaqdan imtina edib. Assambleyanın növbəti iclası 2009-cu ilin sentyabrında Bakıda keçiriləcək.
Azərbaycan parlamentinin payız sessiyası dekabrın 30-da başa çatır.
Mirzəyev qeyd edib ki, parlament rəhbərliyi də Assambleyada təmsil olunmaq istəyən deputatların istəkləri ilə imkanlarının üst-üstə düşməsini qiymətləndirəcək və bundan sonra nümayəndə heyəti formalaşdırılacaq.
Məqalə müəllifi ilə əlaqə saxlamaq üçün ünvan: [email protected]
