Azərbaycan, Lənkəran, 04 yanvar / Trend müxb. P.Əliyeva/ Nəcəf bəy Vəzirov adına Lənkəran Dövlət Dram Teatrı dini mövzuda olan "Kərbəla" tamaşasını nümayiş etdirib.
Nəcəf bəy Vəzirov adina Lənkəran Dövlət Dram Teatrı türk yazıçısı Bəkir Yıldızın "Kərbəla" əsəri əsasında hazırlanan tamaşanı Məhərrəmlik günlərində teatrsevərlərin ixtiyarina verib.
Tamaşa 14 əsr bundan öncə İraqın Kərbəla şəhərində 72 nəfərlə birgə şəhidlik zirvəsinə çatan İmam Hüseynin şücaətindən bəhs edir. Tamaşanın quruluşçu rejissoru, Respublikanın əməkdr artisti Təvəkkül Əliyevin verdiyi məlumata görə, tamaşanın hazirlanmasında əsas məqsəd Kərbəla hadisələri zamanı İslam aləminin müqəddəs şəxslərindən biri olan Həzrəti Hüseyn Əleyhissəlam və tərəfdarlarının haqsızlıq və zülmə qarşı mübarizəsini tamaşaçılara çatdırmaq, uzun illər ərzində Kərbəla hadisələri ilə bağlı formalaşan bəzi yanliş təsəvvürlərin aradan qaldırılmasına nail olmaqdır.
Tamaşada teatrın təcrübəli, peşəkar aktyorları ilə bərabər, gənc aktyorları da istedad və bacarıqlarını nümayiş etdiriblər.
"Kərbəla" şəbeh tamaşası Lənkəran Dövlət Dram Teatrının direktoru İslam Həsənovun təşəbbüsü ilə səhnələşdirilib. Tamaşanın məsləhətçisi isə Qafqaz Müsəlmanları İdarəsinin cənub bolgəsi üzrə səlahiyyətli nümayəndəsi Hacı Sədi Axundzadədir.
Bu tamaşa Nəcəf bəy Vəzirov adına Lənkəran Dövlət Dram Teatrında dini mövzuda səhnələşdirilən ilk səhnə əsəridir.