Azərbaycan, Bakı, 06 yanvar /TrendNews, müxbir C.Babayeva/ Azərbaycanın hakim Yeni Azərbaycan Partiyası çərşənbə günü referendum üzrə təbliğat aparmaq məqsədilə yaratdığı "Yeni Azərbaycan" təşəbbüs qrupunun bildirişini Mərkəzi Seçki Komissiyasına təqdim edib.
MSK-ya təşəbbüs qrupunun yaradılması ilə bağlı keçirilmiş iclasların protokolları, 500-dən 2000-ə qədər olan seçicilərdən ibarət təbliğat qruplarının yaradılması ilə bağlı bildiriş, qrupun səlahiyyətli nümayəndələri və maliyyə məsələləri üzrə səlahiyyətli nümayəndələrinin siyahıları təqdim olunub, Trend -a hakim Yeni Azərbaycan Partiyasından məlumat verilib.
Trend - un arayışı: Azərbaycan parlamenti ötən ayın sonunda keçirilən iclasında Konstitusiyaya əlavələr və dəyişikliklər edilməsi ilə bağlı referendumun martın 18 - də keçirilməsi barədə qərar qəbul edib.
Layihədə bir şəxsin iki dəfədən artıq ölkə prezidenti vəzifəsinə seçilməsini məhdudlaşdıran 101-ci maddənin 5-ci bəndi Konstitusiyadan çıxarılıb.
Bu bəndə əsasən, heç kəs
iki dəfədən artıq təkrar Azərbaycan
Respublikasının prezidenti seçilə bilməz.
Həmin maddəyə, ölkə müharibə
şəraitində olduğu təqdirdə, prezident
seçkilərinin keçirilməsi müddətinin
uzadılmasını nəzərdə tutan bənd daxil
edilib.
Konstitusiyaya digər dəyişikliklər eks-prezidentin hüquqları və statusu; Milli Bankın Mərkəzi Bank, Prezidentin İcra Aparatının Prezident Administrasiyası adlandırılması və s. ilə bağlıdır.
Azərbaycan Respublikası Konstitusiyasının mətninə dəyişikliklər yalnız referendum vasitəsilə daxil edilə bilər (maddə 152). AR Konstitusiyasının mətninə dəyişikliklər Milli Məclis və ya prezident tərəfindən təklif edilirsə, o zaman təklif edilən dəyişikliklər üzrə əvvəlcədən AR Konstitusiya Məhkəməsinin qərarı alınmalıdır (maddə 153).
Azərbaycan Konstitusiyası 1995 - ci ildə referendum yolu ilə qəbul olunub, 2002 - ci ildə Əsas Qanuna əlavə və dəyişikliklər edilib.
Hakim Yeni Azərbaycan Partiyasının təşəbbüs qrupu dekabrın 31-də təsis olunub.
Məqalə müəllifi ilə əlaqə ünvanı: [email protected]